کابل (پژواک، ۷ لړم ۱۴۰۰): د کرکټ نړیوال شل اووریز جام په سیالیو کې افغانستان خپله دویمه لوبه له پاکستان سره وکړه چې دغه هېواد په ۵ ویکټو ترې وګټله.
دغه لوبه نن د متحده عربي اماراتو په دوبۍ ښار کې وشوه چې لیدو ته یې زرګونه افغانان له ملي بیرغونو سره ورغلي وو.
د لوبې پچه افغانستان وګټله او د توپ وهنې پرېکړه یې وکړه.
افغانستان په ۲۰ اوورونو کې د ۶ لوبغاړو په سوځېدو ۱۴۷ منډې وکړې او سیالې لوبډلې ته یې ۱۴۸ منډې هدف وټاکه.
د افغانستان د سر لوبغاړي ژر وسوځېدل خو د پای لوبغاړو محمدنبي او ګلبدین نایب ښه ملګرتیا وکړه او هره یوه ۳۵- ۳۵ منډې وکړې، دغه راز نجیب الله ځدراڼ ۲۲ منډې وکړې.
په توپ اچونه کې پاکستانیو لوبغاړو عماد وسیم ۲، شاهین اپریدي ۲، حسن علي، حارث رووف او شاداب خان یوه- یوه ویکټه واخیسته.
دغه راز افغان لوبغاړو مجیب ځدراڼ ۱، محمد نبي ۱، نوین الحق ۱ او راشد خان دوه ویکټې واخیستې.
پاکستان ته په ورستیو دوو اوورونو کې ۲۴ منډې په کار وې چې د اصف علي په نوم لوبغاړي یې په ۱۹ اوور کې پر کریم جنت څلور شپږیزې ووهلې او لوبه یې وګټله.
له دې وړاندې افغانستان د کرکټ نړیوال شل اووریز جام په سیالیو کې خپله لومړۍ لوبه له سکاټلېنډ څخه ګټلې وه او او دغه هېواد ته یې د ۱۳۰ منډو په توپير ماتې ورکړې وه.
خو پاکستان بیا د دغه ګروپ تر ټولو قوي لوبډلو هند او نیوزیلېنډ ته ماتې ورکړې وه.
د افغانستان د کرکټ لوبډلې مینه والو په خواله رسنیو کې د افغانستان نننۍ لوبه ستایلې او لیکلي یې دي چې که څه هم افغانستان لوبه و نه ګټله خو ښه لوبه یې وکړه او سیاله لوبډله یې په پرله پسې توګه تر فشار لاندې راوستې وه.
ټاکل شوې ده افغانستان د کرکټ نړیوال شل اووریز جام په سیالیو کې خپله درېیمه لوبه له نیمبیا سره وکړي.
دغه لوبه د لړم په ۹مه د متحده عربي اماراتو په ابوظبي ښار کې ترسره کېږي.
Views: 47
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن