<p style="text-align: justify;">فيروزکوه (پژواک، ۲۴ لېندۍ۱۴۰۰): په غور کې يوې کونډې چې د خپلو ماشومانو ژوندي پاتې کېدو لپاره سوالګري کوي، د بېړنۍ مرستې غوښتنه کړې او ويلي یې دي که مرسته ورسره ونه شي، ناروغ ماشومان به يې مړه شي.</p>
<p style="text-align: justify;">د فاطمې په نوم دغه کونډه چې د غور د مرکز فېروزکوه ښار لوېديځ ته د الله يار سيمې اوسېدونکې ده، پژواک ته وويل چې خاوند يې د جمهوري نظام له سقوط مخکې وژل شوى او له هغه وروسته يې د خپلو کوچنيو ماشومانو سرپرستي پر غاړه اخیستې ده.</p>
<p style="text-align: justify;">فاطمه- چې د سواد له نعمته بې برخې ده- وايي، په لومړيو کې يې چې خاوند ووژل شو، د خلکو په کورونو کې د کار له لارې یې خپلو درېيو اولادونو ډوډۍ پیدا کوله، خو اوس د فقر ډېرېدو له امله کار نه ورته پیدا کېږي.</p>
<p style="text-align: justify;">یادې کونډې خپلو ناروغو ماشومانو ته اشاره وکړه او ویې ویل چې اوس دوی ټول د یخنۍ له امله ناروغ شوي؛ ځکه چې د اقتصادي کمزورتیا له امله یې بخارۍ نه ده اېښې.</p>
<p style="text-align: justify;">هغې د ماشومانو د ساتنې په برخه کې خپلې تاتوانۍ ته په اشارې ویل: «که دولت او موسسې له موږ سره مرسته ونه کړي، ټول خپل ټول اولادونه مې له لاسه وځي، یو یې هم ژوندی نه پاتې کېږي.»</p>
<p style="text-align: justify;">هغه وايي، څو ځلې يې موسسو ته عريضې کړې، خو چا يې غږ نه دى اورېدلى.</p>
<p style="text-align: justify;">فاطمه وايي، هره ورځ د ښار بېلابېلو سيمو ته ځي او له خلکو خيرات غواړي، خو ډېری ورځې تش لاس کور ته ستنېږي.</p>
<p style="text-align: justify;">د هغې په وينا، که د ګاونډيانو مرسته ورسره نه وای، ماشومان به یې مخکې مړه وو.</p>
<p style="text-align: justify;">د فاطمې يو ګاونډي احمد اصف وويل چې ګاونډيان يې هم ښه اقتصادي وضعيت نه لري او د یادې کونډې د ماشومانو درملنه یې په وس نه ده پوره.</p>
<p style="text-align: justify;">نوموړي په دغه ولايت کې له خيريه موسسو او سيمه ييزو مسوولینو هم وغوښتل چې له يادې کورنۍ سره دې بېړنۍ مرستې وکړي؛ ځکه ټول ماشومان یې سینه بغل دي.</p>
<p style="text-align: justify;">نوموړي زیاته کړه: «دوی باید ژر تر ژره له دې کورنۍ سره مرسته وکړي، څو د یادې کورنۍ ماشومان د یخنۍ او لوږې له امله مړه نه شي.»</p>
<p style="text-align: justify;">بلخوا د غور د کډوالو او راستنېدونکو چارو ریاست چارواکي وايي چې هڅه کوي له اړمنو کورنیو او هغو کسانو سره مرستې وکړي چې په ډېره بېوزلۍ کې ژوند کوي.</p>
<p style="text-align: justify;">دغور د کډوالو چارو سرپرست رييس مولوي سلطان محمد حماس په وينا، دوى له خپلې واکمنۍ راهیسې د موسسو په مرسته تر پنځو زرو ډېرو کورنيو سره مرسته کړې او هڅه کوي چې اړمنې کورنۍ پیدا او د مرستې په پروګرام کې یې شامل کړي.</p>
