جلال اباد (پژواک، ۳ سلواغه ۱۴۰۰): په ننګرهار کې پاسپورټ اخيستونکي شکايت کوي چې په مياشتو- مياشتو ورته د پاسپورټ اخيستو نوبت نه ورسېږي او غوښتنه کوي چې بايد په دې برخه کې اسانتياوې رامنځته شي.
چارواکي وايي، هره ورځ شاوخوا درې زره کسان د پاسپورت لپاره غوښتنليکونه ورکوي، ٧٠٠ کسان بايومټريک کېږي خو مرکز بيا يواځې ۱۵۰ کسانو ته پاسپورټونه چاپوي.
سيد احمد چې د ننګرهار د سره رود ولسوالۍ اوسېدونکی دی او د پاسپورټ اخيستو لپاره د پاسپورټ ادارې ته ورغلی، وايي، هره ورځ راځي خو د بايومټريک نوبت یې نه ور رسېږي.
دين محمد چې خپل ځان او ناروغې مور لپاره پاسپورټ جوړوي، وايي که څه هم فساد او واسطه نشته خو د خلکو ګڼه ګوڼه زياته ده چې له امله يې پر وخت پاسپورټونه نه شي ترلاسه کولای.
هغه غوښتنه کوي چې د پاسپورټ عمومي رياست دې د ننګرهار پاسپورټ امريت ته د پاسپورټونو د چاپ په برخه کې زياته ونډه ورکړي.
خو مسوولين بيا د پاسپورټ په برخه د اسانتياوو رامنځته کولو ژمنه کوي.
د ننګرهار د پاسپورټ امر مولوي خليل رحمن پژواک اژانس ته وويل چې د ورځې تر دوو زرو ډېر کسان غوښتنليکونه ورکوي، لږ تر لږه تر ۷۰۰ کسانو پورې بايومټريک کوي خو په مرکزي اداره کې بیا د ورځې یوازې ۱۵۰ پاسپورټونه د ننګرهار لپاره چاپېږي.
د هغه په خبره، دا چاره د دې لامل شوې چې د خلکو ګڼه ګوڼه ورځ تر بلې ډېره او شکايتونه راپورته شي؛ خو وايي د چارو د سمون لپاره يې په لنډمهال ډول د ۱۵ ورځو لپاره د نوو غوښتلينکونو اخيستلو لړۍ بنده کړې او نورې اسانتياوې به هم رامنځته کړي.
د پاسپورټ امر زیاتوي چې په تېرو مياشتو کې يې د پاسپورټونو ورکولو له اړخه تر ۹۰ ميليون افغانۍ پورې عوايد راټول کړي دي.
د يادونې ده، لا هم هره ورځ سلګونه خلک د پاسپورټ ترلاسه کولو لپاره د ننګرهار امنيې قوماندانۍ ته مراجعه کوي.
