<p style="text-align: justify;">فیروزکوه (پژواک، ۲۲ کب ۱۴۰۰): د غور د عامې روغتیا ریاست مسوولین په دغه ولایت کې د شري ناروغۍ پر ډېرېدو اندېښمن دي او وایي چې په تېره یوه میاشت کې پر دې ناروغۍ اخته شپږ ماشومان مړه شوي دي.</p>
<p style="text-align: justify;">د غور ولایتي روغتون رییس عبدالاحد نوري پژواک خبري اژانس ته وویل: «د ټولو هغو مریضانو شمېر چې په تېره یوه میاشت کې یې یاد روغتون ته مراجعه کړې، ۱۰۰ کسانو ته رسېږي چې له دې ډلې ۶۸ رغېدلي، ۳۰ کسان بستري دي او ۶ نورو خپل ژوند له لاسه ورکړی دی.»</p>
<p style="text-align: justify;">هغه زیاته کړې چې دغه ناروغي د دغه ولایت په ډېرو سیمو او ولسوالیو کې خپره شوې او ډېر ماشون پرې اخته شوي دي.</p>
<p style="text-align: justify;">د نوري په خبره، که څه هم د دغه ولایت مواصلاتي لارې له ډېرو ستونزو سره مخ دي، خو بیا هم هڅه کوي چې ټولو ناروغانو ته رسېدنه وکړي.</p>
<p style="text-align: justify;">په تېره یوه میاشت کې دغه رقم په داسې حال کې د غور د روغتیا برخې مسوولینو له خوا وړاندې کېږي چې دوه میاشتې مخکې د یاد ولایت د عامې روغتیا ریاست له خوا پر شري د ۲۰۰۰ ماشومانو اخته کېدو او د همدې ناروغۍ له امله د ۷۰ ماشومانو د مړه کېدو خبر ورکړی و.</p>
