جلال اباد (پژواک، ۳ غبرګولی ۱۴۰۱): د افغانستان لپاره د ملګرو ملتونو پراختيايي پروګرام/ UNDP مسوولين وايي، د ختيځ زون لپاره يې ۹ ميليونه ډالر ځانګړي کړي چې د زدهکړو، روغتيا او خلکو ته د وړو کاروبارونو په برابرولو به يې ولګوي.
د ننګرهار ولايت مقام د رسنيو له دفتره نن (د غبرګولي ۳مه) پژواک اژانس ته په را استول شوې خبرپاڼه کې راغلي چې دا څرګندونې د UNDP مرستيالې ننګرهار ته د سفر پر مهال د دغه ولايت له مرستيال والي سره په ليدنه کې کړې دي.
په خبرپاڼه کې راغلي، د ننګرهار مرستيال والي مولوي محمدرباني ناصح په افغانستان کې د ملګرو ملتونو پراختيايي پروګرام يا UNDP مرستيالې سورايو سره په دغه ولايت کې د بيا رغنیزو پروژو د تطبيق په موخه وليدل.
نوموړي د UNDP له مرستيالې مننه وکړه چې په ننګرهار کې يې په بېلابېلو برخو کې ګټورې پروژې پلې کړې دي او همدا راز يې د کډوالو، پوهنې، روغتيا، کرنې، اوبو لګولو، چيک ډيمونو، سربندونو او نهرونو جوړولو په برخه کې د همکارۍ غوښتنه وکړې.
مرستیال والي دغه راز د ننګرهار په اچين ولسوالۍ کې د بمونو مور له امله د ويجاړو شوو کورونو بيا رغونې، د ناروغيو کنټرول، له يادې سيمې د بېځايه شوو کورنيو په بېرته لېږد، يو شمېر ادارو ته د ودانيو جوړولو، ختيځ روغتيايي کمپلیکس ته د پاملرنې او ګڼ شمېر نورو برخو کې د مرستو وړانديزونه وکړل.
خبرپاڼه زياتوي، په افغانستان کې د UNDP مرستندويه ادارې مرستیالې سورايو د ولايت له مرستيال مننه وکړه چې په مهمو برخو کې يې وړانديزونه وکړل.
هغې وويل: «موږ اوسمهال ختيځ زون لپاره نهه ميليونه امريکايي ډالر ځانګړي کړي چې زدهکړو، روغتيا او وړو کاروبارونو جوړولو برخه کې به يې په لګښت ورسوو.»
نوموړې د ولايت مرستيال ته ډاډ ورکړ چې وړانديزونو ته په کتلو به يې يو شمېر پروژې دوی او پاتې نورې به يې د ملګرو ملتونو اړوند نورو انجوګانو سره د پلې کېدو په موخه شريکې کړي.
د ملګرو ملتونو پراختيايي ادارې مرستيالې زياته کړه چې دوی دې شعار «پاتې کېږو او خدمت کوو» ته ژمن دي او د بيا رغونې چارو ته به پراختيا ورکوي.
