کابل (پژواک، د چنګاښ لومړۍ نېټه ۱۴۰۱): د کورنیو چارو سرپرست وزیر خلیفه سراجالدین حقاني د مجمعالفقه الاسلامیة نړيوالې ټولنې له مشر او استازو سره په کابل کې وکتل.
د دغه وزارت له خوا د چنګاښ په لومړۍ نيټه په یوه خپره شوې خبرپاڼه کې راغلي، د کورنیو چارو وزیر په دې کتنه کې وویل چې علماء پر اسلامي امت باندې د الله تعالی رحمت دی او د عالمانو وحدت، همغږي او هدایات د امت دنیوي او اخروي ستونزې له منځه وړي.
هغه زیاته کړې چې د الله تعالی ستر نعمت امن دی او امن د ټولو پرمختګونو اساس دی چې الحمدلله دا مهال افغانستان ترې برخمن دی.
د هغه په خبره، هغه مشکلات به د علماءکرامو د مجلسونو او توصیو په برکت حل شي چې دا مهال افغانستان ورسره مخ دی.
د یادې ټولنې استازو د اسلامي امارت له تود هرکلي او مېلمهپالنې مننه وکړه او په پکتیکا کې یې د تېرې شپې زلزلې قربانیانو ته تسلیت وړاندې کړ او د نظام د استحکام لپاره یې له خلیفه سره خپلې مشورې شریکې کړې.
هغوی ژمنه کړې چې خپلو مشرانو او هېوادونو ته به د اسلامي امارت واقعي تصوير وړاندې کوي او د افغانستان د پرمختګ لپاره به خپلي همکارۍ نه سپموي.
Visits: 69
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن