<p style="text-align: justify;">کندوز (پژواک، ۶ چنګاښ ۱۴۰۱): د کندوز روغتیایي چارواکي وایي، په تېرو لسو میاشتو کې د دغه ولایت په حوزوي روغتون کې د زېږون له امله د میندو مړینه کمه شوې ده او په دغه موده کې ۴ ولادي ناروغانو ژوند بایللی دی.</p>
<p style="text-align: justify;">د چارواکو په وینا، دا شمېره له لسو میاشتو مخکې موده کې ۱۱ کسان وو او د زېږون پر مهال د مېندو د مړینې کمېدو لامل روغتیايي مرکزونو ته د ناروغانو مراجعه، د روغتیايي مرکزونو ۲۴ ساعته فعالیت او دغو مرکزونو ته د ناروغانو پر وخت رسېدنه ده.</p>
<p style="text-align: justify;">د کندوز د حوزوي روغتون د نسایي او ولادي څانګې مسوولې راضیه شیدایي پژواک سره خبرو کې وویل، په وروستیو لسو میاشتو کې څلور ناروغانو د زېږون پر مهال ژوند له لاسه ورکړی، حال دا چې دغه شمېره لس میاشتې مخکې ۱۱ کسان وو.</p>
<p style="text-align: justify;">هغې د زېږون پر مهال د ميندو د مړينې د کمېدو لامل د لويو لارو د امنیت خوندیتوب، روغتيايي مرکزونو ته د ناروغانو پر وخت رسېدنه او د هغو مرکزونو فعالیت په ګوته کوي چې په تېرو وختونو کې د بېلابېلو لاملونو له امله یي په وقفهیی ډول فعالیتونه کول.</p>
<p style="text-align: justify;">هغې زیاته کړه: «په وروستیو لسو میاشتو کې د حوزوي روغتون د مراجعینو شمېر ۳۵۳۸ ناروغانو ته رسېږي چې له دې ډلې ۹۹۸ کسان بستر شوي او د مړو شویو کسانو شمېر ۴ ته رسېږي، که دا په پرتلیزه توګه وګورو له دې مودې مخکې زموږ مراجعین کم وو؛ یعنې موږ ۲۵۳۰ ناروغانې درلودلې چې له دې ډلې ۷۲۰ ناروغانې په بستر کې وې او ۱۱ ناروغانو خپل ژوند له لاسه ورکړی.»</p>
<p style="text-align: justify;">په ورته مهال، پایوازان بیا په لرو پرتو سیمو کې د درملو او متخصصانو کموالی جدي ستونزې ګڼي او د حل کېدو غوښتنه یې کوي.</p>
<p style="text-align: justify;">په ورته وخت کې د کندوز له چهاردرې ولسوالۍ څخه حوزوي روغتون ته د درملنې په موخه راغلی عطاءالله چې نسایي ناروغ لري، وايي: «زموږ غوښتنه دا ده چې په ولسوالیو کې روغتیایي مرکزونه فعال شي؛ مرکزونه شته خو د درملو کمښت دی، درمل نه شو پېرلی، د خلکو اقتصاد کمزوری دی، په ولسوالیو کې باید سم مرکزونه فعال شي څو خلک ښار ته د راتلو لپاره اړ نه شي.»</p>
<p style="text-align: justify;"><em> </em>خو د کندوز د عامې روغتیا ریس نجیبالله ساحل په دغو مرکزونو کې د درملو د کمښت ستونزه نه مني او وایي، همدا اوس په دغه ولایت کې ۷۵ روغتیايي مرکزونه خلکو ته روغتیایي خدمات وړاندې کوي.</p>
<p style="text-align: justify;">نوموړي زیاته کړه: «د کندوز په حوزوي روغتون کې د درملو ستونزه حل شوې ده؛ فعلا ناروغانو ته ۹۵ سلنه درمل ورکوو، خو د خلکو تمې ته پام ستونزې لرو، په کندوز کې چې ۷۵ کلینیکونه شته، د خلکو ستونزې نشي حل کولای؛ عامې روغتیا وزارت هڅه کوي څو په دغه ولایت کې د کلینیکونو شمېر ډېر کړي او موږ هم دغه ستونزه له WHO سره شریکه کړې څو په کندوز کې لس نوي کلینیکونه جوړ شي.»</p>
<p style="text-align: justify;">دا په داسې حال کې ده چې تر دې وړاندې به د جګړو او نورو ستونزو له امله ګڼو ناروغانو روغتیايي مرکزونو ته پر وخت د نه رسېدو له امله ژوند له لاسه ورکول.</p>
