مهترلام، پاراخ (پژواک، ۲۷ چنګاښ ۱۴۰۱): په لغمان کې د ۱۷۲زره ډالرو په ارزښت د ۱۲ پروژو د پلې کولو چارې پيل شوې او په پنجشېر کې د څه باندې ۳ میلیون افغانيو په لګښت یو ګودام ګټې اخيستنې ته وسپارل شو.
د لغمان ولایت د کرنې او مالدارۍ رییس مولوي محمدولي محسن پژواک خبري اژانس ته وویل چې د يادو ۱۲ پروژو چارې پرون په الیشنګ او الینګار ولسوالیو کې پيل شوې او لګښت يې د خوړو او کرنې نړۍوالې ادارې له خوا ورکول کېږي.
ده وویل چې په دغو پروژو کې د کرنيزو ځمکو د ساتنې په موخه د استنادي دېوالونو او سربندونو جوړول شامل دي.
نوموړي زياته کړه، په یادو پروژو کې ۱۵۴۰ کسانو ته – چې هر یوه ته د میاشتې ۱۰۰ ډالره ورکول کېږي – د کار زمينه برابره شوې او په شاوخوا يوه میاشت کې به بشپړې شي.
د یو بل خبر له مخې، د پنجشېر د اطلاعاتو او فرهنګ رییس مولوي نصرالله ملکزاده وايي چې نن په دغه ولایت کې د ۳ میلیون ۳۷۱زره او ۹۵۳ افغانيو په لګښت يو ګودام ګټې اخيستنې ته وسپارل شو.
ده پژواک ته وویل چې دغه ګودام د پنجشېر په مرکز پاراخ کې د برېښنا د عمومي ریاست په مالي ملاتړ د برېښنايي توکو د ساتنې په موخه جوړ شوی دی.
Visits: 16
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن