کابل (پژواک، ۱۷ زمری۱۴۰۱): د سرپرست حکومت د بهرنيو چارو وزارت مرستيال وايي، په افغانستان کې اوس تر بل هر وخت د هر مذهب پيروان خوندي دي او هیڅ ډول ستونزې ورته نشته.
د بهرنيو چارو وزارت مرستيال عباس ستانکزي دا څرګندونې نن (د زمري ۱۷مه) د کابل ښار د دشت برچي سیمې په خاتم الانبیا حوزه کې د عاشورا په مناسبت نیول شوو مراسمو کې وکړې.
په دې اړه په جوړه شوې غونډه کې د چارواکو ترڅنګ سلګونو عالمانو او خلکو ګډون کړی و.
ستانکزي دې غونډې ته په خپله وینا کې وویل، په افغانستان کې هر ډول مذهبي او غیرمذهبي خلک شته خو د «اسلامي امارت» د پالیسۍ مطابق، هیڅوک حق نه لري هغوی ته مزاحمت وکړي.
د نوموړي په وینا، د هر مذهب پيروان کولای شي په ازادانه ډول خپل عقيدوي او مذهبي مراسم ترسره کړي.
هغه زياته کړه، په تېرو شلو کلونو کې په يو او بل نوم هیڅ مذهب خوندي نه وو خو اوس چې اسلامي نظام راغلی، هر مذهب خپل ځای لري.
نوموړي وویل، تېر شوي اختلافات او جنجالونه شا ته پرېږدي او نور د پښتون، هزاره، اوزبک او تاجک په نوم څوک نه پېژني.
د هغه په خبره: «د بيان ازادي هم پر خپل ځای ده، اسلامي امارت د بيان له ازادۍ سره کومه ستونزه نه لري خو په دې شرط چې له خپل حده عبور ونه کړي.»
ستانکزي زياته کړه، «اسلامي امارت» په ټول توان کوښښ کوي هېوادوالو ته له تعصب څخه پاکه روحيه ورکړي او هېواد د ابادۍ پر لار روان کړي.
دی وايي، که ټول هېوادوال يو موټی شي، لرې به نه وي داسې يو افغانستان جوړ شي چې له سيمې او نورو هېوادونو سره مرستې وکړي.
هغه زياته کړه: «که چېرې راغلی نظام له لاسه ځي، کورني او بهرني دښمنان لاسوهنه کوي نو ښايي يو ځل بيا کلونه کلونه په نورو هېوادونو کې کډوال او سرګردان وګرځو.»
هغه وايي، په ټولنيزو شبکو کې له ۷۰ تر ۸۰ فيصده پورې تبلیغات د دوی پر ضد دي او دا د هغه چا له لوري پر مخ وړل کېږي چې نه غواړي متحد او جوړ افغانستان وويني.
د بهرنيو چارو وزارت مرستيال عباس ستانکزي دا څرګندونې په داسې حال کې کوي چې په افغانستان کې د ملګرو ملتونو مرستندویه ادارې (یوناما) له افغان چارواکو غوښتي وو چې د لږکیو امنیت ته پام وکړي څو د عاشورا مراسم له بل برید پرته ونمانځل شي.
یادې ادارې د یوه ټویټ په کولو په کابل کې هغه بریدونه هم غندلي چې په پایله کې یې ۱۲۰ کسانو ته مرګ ژوبله اوښتې وه.
غړيYou need to subscribe to view the full article. Please login or register a new account.
