افغان سفارت: پاکستان کې د قانوني اسناد نه لرلو په تور ځیني نیول شوي افغان کډوال خوشي شول

کابل (پژواک، ۱۸ وږی ۱۴۰۱): پاکستان کې د افغانستان سفارت وايي، په کراچۍ کې د قانوني اسنادو نه لرولو په تور یو شمېر هغه نیول شوي افغان کډوال چې ښځې او ماشومان هم پکې شامل دي، ازاد شول.

په اسلام آباد کې افغان سفارت نن «دوږي ۱۸مه» په یوه ټویټ کې ویلي چې څه موده مخکې د دغه هېواد پولیسو کابو ۳۰۰ افغان کډوال د اسنادو نه لرولو په تور نيولي وو.

سرچینې زیاته کړې چې د افغانستان سفارت د کډوالو اتشه او په کراچۍ کې افغان قونسلګري د یاد شمېر افغان کډوالو د خوشي کولو په اړه له پاکستاني چارواکو سره په اړيکه کې دي او په وینا يې چې ټول به په نږدې راتلونکې کې آزاد شي.

دغه سفارت وايي: «له یادو افغانانو سره په کراچۍ کې د افغان جنرل قونسلګرۍ د استازو له ملاقات وروسته جوته شوه چې د وکیلانو له فیس پرته پر هر بندي د محکمې له لوري ۱۰۰۰ کلدارې جرمانه راغلې چې یو شمېر یې نن خوشې شوي او دپاتې نورو د خوشې کېدو پرېکړه به را روانو ورځو کې وشي.»

سرچینې د خوشې شویو کسانو شمېر نه دی ښودلی او ویلي یې دي چې ځينې خلک غواړي له دې پېښې «شخصي ګټه» واخلي او د نیول شويو افغانانوپه نوم چنده راټوله کړي او په دې اړه له رسنیو سره د ځینو اشخاصو ادعاوې هم بې اساسه دي.

د افغانستان سفارت ټینګار کوي چې له دا ډول پېښو څخه باید ناوړه استفاده ونه شي.

د یادونې ده چې تېره شپه د کوزې پښتونخوا په کواټ ښار کې مېشت د خوږیاڼو قومي مشر حاجي نظر پژواک ته ويلي و چې د یادو کسانو د دوسیو حلولو په موخه له کواټ څخه کراچۍ تللی خو دا چې پیسې نه وې، په سعودي کې یې میشتو افغانانو سره اړیکه نیولې، هغوی چنده راټوله کړه او په وينا يې په یادو دغو پیسو یې وکیلان ونیول چې د ځینو ضمانتونه وشول او د نورو پاتې دي.