<p style="text-align: justify;">پلخمري (پژواک، ٢١ وږى ١٤٠١): بغلان کې پر نشهيي توکو د اخته کسانو شمېر داسې مهال له ٦٠ زرو اوړي چې له تېر يو کال راهيسې په دغه ولايت کې د معتادينو د درملنې مرکز هم تړل شوى دى.</p>
<p style="text-align: justify;">په بغلان کې د روږدو د درملنې د ٣٠ بستريز روغتون مشر ډاکټر رحم خدا نوري د وږي په ٢١مه پژواک خبري اژانس ته وويل چې په دغه ولايت کې د تېرو کلونو په پرتله د روږدو کسانو شمېر ډېر شوى دى.</p>
<p style="text-align: justify;">هغه وويل چې د پخواني نظام پر مهال په دغه ولايت کې د روږدو شمېر ٥٥ زره و خو اوس دغه شمېر له ٦٠ زرو کسانو اوښتی دی.</p>
<p style="text-align: justify;">د نوموړي په وينا، له تېر يو کال راهيسې په دغه ولايت په نشهيي توکو د اخته کسانو درملنې مرکز هم د مالي ستونزو له امله تړل شوى او اووه مياشتې کېږي چې د دغه روغتون ډاکټرانو او نورو کارکوونکو ته تنخوا نه ده ورکړل شوې.</p>
<p style="text-align: justify;">دى زياتوي: «که څه هم چې زموږ پرسونل ته معاش نه دى ورکړل شوى خو بيا هم ډاکټرانو په کور او بيرون کې د معتادينو درملنې او مشورو ته ادامه ورکړې.»</p>
<p style="text-align: justify;">د نوموړي په وينا، څو ځلې ورسره د ياد روغتون د بېرته فعالولو ژمنې شوې خو تر اوسه دغه چاره نه ده ترسره شوې.</p>
<p style="text-align: justify;">خو د اړوندې موضوع په اړه د بغلان امنيې قوماندانۍ له نشه يي توکو سره د مبارزې مدير ملا محمدنبي کامران پژواک ته وويل چې په دغه ولايت په نشه يي توکو د اخته کسانو شمېر نه دى ډېر شوى.</p>
<p style="text-align: justify;">دى مني چې له تېر يو کال راهيسې په دغه ولايت کې د معتادينو درملنې مرکز تړل شوى خو زياتوي چې دغه مسئله يې له اړوند وزارت او نورو چارواکو سره شريکه کړې او هغوی يې د بېرته فعالولو ژمنه ورسره کړې.</p>
<p style="text-align: justify;">په ورته وخت کې د بغلان د معتادينو له ډلې لعلګل پژواک ته وويل چې له ١٥ کلونو راهيسې نشهيي توکي کاروي او دا مهال غواړي چې درملنه يې وشي.</p>
<p style="text-align: justify;">ده وړانديز وکړ: «له دې نه چې حکومت ټول معتادين په يوه کوټه کې اچوي، ښه دى چې داسې دوا موږ ته راکړي چې دردونه مو ارام شي.»</p>
<p style="text-align: justify;">د حکومتي مسوولينو د معلوماتو له مخې، دا مهال په ټول هېواد کې ۳،۵ میلیون کسان پر نشهيي توکو اخته دي او د درملنې لپاره يې هلې ځلې روانې دي.</p>
