<p style="text-align: justify;">جلالاباد (پژواک، ۲۹ وږی ۱۴۰۱): د ننګرهار د کرنې رياست له لوري د یواېنډیپي ادارې په پنځه ميليون افغانيو مالي لګښت د دغه ولایت په سرهرود ولسوالۍ کې د اوبو يوه سربند جوړولو چارې پيل شوې.</p>
<p style="text-align: justify;">چارواکي وايي، د دغه سربند په جوړېدو سره به لږ تر لږه ۱۰۰۰ جريب ځمکه خړوبه شي او د سېلابونو د ګواښ مخه به هم ونيول شي.</p>
<p style="text-align: justify;">د ننګرهار د کرنې رياست مرستيال قاري فضل الرحمن صادق د وږي په ۲۹مه د یاد سربند پرانیستې په مراسمو کې وويل، د سرهرود ولسوالۍ د بالاباغ په سيمه کې د اوبو يوه سربند جوړېدو کار پيل شو.</p>
<p style="text-align: justify;">هغه زياته کړه، د دغه سربند جوړېدو چارې به درې مياشتې وخت ونيسي او د ملګرو ملتونو پرمختیايي ادارې (UNDP) له خوا به پرې پنځه ميليون افغانۍ ولګول شي.</p>
<p style="text-align: justify;">دی وايي، دغه سربند ۵۵۰ متره اوږودوالی لري چې په اساسي ډول جوړيږي او ترڅنګ يې دوه پولګوټي (پلچکونه) او يو ترناب هم جوړېږي.</p>
<p style="text-align: justify;">د قاري صادق په وينا، د دغه سربند له جوړېدو سره به د بالاباغ سيمې شاوخوا ۱۰۰۰ جريب ځمکه خړوبه شي او دغه راز به ګڼې ځمکې د سېلاب له زيانونو هم په امن کې شي.</p>
<p style="text-align: justify;">د سيمې اوسېدونکي د دغه سربند پر جوړېدو خوښ دي.</p>
<p style="text-align: justify;">يو قومي مشر ملک اول خان دا سربند د دې سيمې لپاره ډېر ګټور ياد کړ او زياته يې کړه چې اوسمهال شاوخوا زر جريبه ځمکه د اوبو له کمښت سره مخ ده چې د سربند له جوړېدو سره به ټوله ځمکه خړوبه شي.</p>
<p style="text-align: justify;">د ننګرهار د کرنې رياست چارواکي وايي، هڅه کوي چې د نړۍوالو ادارو په مالي ملاتړ د دغه ولايت په يو شمېر نورو سيمو کې هم ورته سربندونه جوړ کړي.</p>
