هرات (پژواک، ۲۵ لړم ۱۴۰۱): په هرات کې د مليبسونو فعالیت په کمېدو سره، د دغه ولایت یو شمېر اوسېدونکي وایي، په اوسنیو شرایطو کې د خلکو کمزوري اقتصادي وضعیت ته په کتو اړتیا ده چې په ښار او ولسوالیو کې د دغو وسایطو فعالیت ډېر شي.
دوی وايي، اړتیا ده چې په ښار او ولسوالیو کې د مليبسونو فعالیت پراخ شي څو عام خلک او ټیټرتبه مامورین وکولای شي چې له دغو خدمتونو برخهمن شي.
د هرات اوسېدونکی محمدناصر وايي، دا مهال څو محدود مليبسونه د ښار په ځینو سیمو کې فعالیت کوي.
د هغه په خبره، کله چې د مليبسونو فعالیت ښه و، نو دوی به اوږدې لارې په کم لګښت (له پنځه تر لس) افغانیو وهلې؛ خو اوس د دغې تصدۍ د فعالیت په محدودېدو سره اړ دي چې خپل هدف ته د رسېدو لپاره هره ورځ ښاري ټکسيانو ته تر ۸۰ افغانۍ کرایه ورکړي.
د نوموړي په وینا، دغه کرایه هره ورځ په داسې حال کې ورکوي چې ورځنی عاید یې له ۲۵۰ افغانیو ډېر نه دی.
د هرات بل اوسېدونکي علياحمد هم وویل چې د نړۍ په ټولو هېوادونو کې مليبسونه فعال دي او خلک له یو ځایه بل ته د مليبس له لارې تګ راتګ کوي.
هغه په دې باور دی چې مليبسونه د خلکو لپاره اسانتیاوې رامنځته کوي.
د هرات دغه اوسېدونکی ادعا کوي چې د دغه ولایت په ګوټګوټ کې د مليبسونو د فعالیت کموالي له امله خلک له یوه ځایه بل ته د تګ پر مهال له ستونزو سره مخ دي.
هغه څرګنده کړه چې په پلي ډول د لسګونه کیلومتره لارې وهل سخت دي او که څو مختلف مسیرونه په ټکسي موټر کې لاړ شي، نو ډېر لګښت پرې راځي.
بلخوا، د یاد ولایت د مليبس تصدۍ آمریت مسوولینو له پژواک خبري اژانس سره په خبرو کې وویل، دغه اداره دا مهال ۵۷ مليبسونه په واک کې لري؛ خو د مالي ستونزو او چلوونکو نه شتون له امله د دغه ولایت په ښار او ولسوالیو کې یوازې ۱۸ مليبسونه خلکو ته خدمتونه وړاندې کوي.
د دغې تصدۍ امر مولوي محمدجمعه خادم وویل، توانېدلي چې ۵۷ مليبسونو بېرته ترمیم کړي؛ خو دا مهال په ښار کې ۱۲ او په ولسوالیو کې ۶ مليبسونه فعالیت کوي.
هغه زیاته کړه، اداره یې هوډ لري چې په نږدې راتلونکي کې د هرات ښار په نورو مسیرونو او ولسوالیو کې څو نور مليبسونه هم فعال کړي.
نوموړی د یادې ادارې پر وړاندې مالي ستونزې او د چلوونکو نشتوالی لویه ننګونه ګڼي او د سرپرست حکومت له چارواکو غواړي څو د هواري په برخه کې یې پاملرنه وکړي.
په هرات ښار کې د «ګلها چوک» یو ترافیک پولیس سمیعالله له پژواک سره په خبرو کې وویل، په ښار کې د مليبسونو شتوالی په چوکونو کې د ګڼېګوڼې د مخنیوي لامل هم ګرځي.
هغه زیاته کړه: «ډېری بېوزله او د ښار مختلفو ځایو ته تلونکي کسان پر سړک ولاړ وي څو له ټکسي چلوونکو سره پر کرایه چنه ووهي؛ خو دغه کار د ګڼېګوڼې لامل کېږي چې ښاري ترافیک هم له ستونزې سره مخ کوي.»
هغه تېرو تجروبو ته په اشارې سره زیاته کړه چې مخکې به مليبسونو په کمه کرایه د خلکو د لېږد په برخه کې بنسټیز رول درلود چې د ښار په کچه به ګڼهکوڼه هم کمه وه.
نوموړی هم د یاد ولایت له تصدۍ غواړي چې د یادې ستونزې د هواري په برخه کې جدي اقدام وکړي څو په ښار کې ګڼهګوڼه کمه شي.
د یادونې ده چې هرات ښار ته ډېری مسافر وړونکي مليبسونه شاوخوا ۱۴ کاله مخکې راوړل شوي، د یادو مليبسونو له کاره لوېدل او کموالی په دغه ولایت کې د مليبس تصدۍ د امریت له لویو ستونزو څخه ګڼل کېږي.
د هرات د لېږد رالېږد شبکې د شمېرو له مخې، د خلکو د ښه تګ راتګ لپاره په دغه ښار کې ۱۰۰ مليبسونو ته اړتیا ده.
Visits: 47
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن