کابل (پژواک، ٢٩ لړم ۱۴۰۱): د کانونو او پټرولیم وزارت سرپرست د عینک مسو پروژې له قراردادي چینایي شرکته غوښتي چې خپل ټول مسوولیتونه او مکلفیتونه ترسره کړي.
دغه وزارت د لړم په ۲۸مه پر خپله ټويټرپاڼه لیکلي چې د کانونو او پټرولیم وزارت سرپرست مولوي شهابالدین دلاور د عینک مسو پروژې «MCC» چینایي قراردادي شرکت له اجراییوي رییس اوومین سره په خپل کاري دفتر کې ولیدل.
په ټويټ کې راغلي چې په دې لیدنه کې د کانونو او پټرولیم سرپرست د «اېمسيسي» چینایي شرکت له اجرائیوي مرستیال سره د عینک مسو کان له ساحې د لرغونو اثارو د انتقال، د شته ننګونو د حل او قراردادونو په اړه خبرې کړي.
سرچېنې لیکلي چې په دې ناسته کې د کانونو او پټرولیم وزیر وويل: «اېمسيسي شرکت باید د قرارداد له مخې خپل ټول مسوولیتونه او مکلفیتونه ترسره کړي او د یادې پروژې عملي کار د پیل په اړه یې ټینګار وکړ.»
دغه راز په ياده ليدنه کې د قراردادي شرکت اجرائیوي مرستیال اوومین ويلي چې د عینک له سیمې د لرغونو اثارو له بشپړ انتقال وروسته به په دغه ځای کې خپلې ساختماني چارې پیل کړي.
د راپورونو له مخې، په لوګر کې د عینک مسو کان – چې د څه باندې ۱۱ میلیون ټنه مسو د شتون اټکل پهکې شوی، د استخراج تړون د ۳۰ کلونو لپاره په ۱۳۸۸ لمریز کال کې له چینايي کمپنۍ سره شوى دى.
Visits: 70
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن