کابل (پژواک، ۵ لېندۍ ۱۴۰۱): د اسلامي حزب مشر ګلبدین حکمتیار وایي، د افغانانو ترمنځ له کوم قید او شرط پرته د ریښتینو مذاکراتو پیل، د حل یوه واقعي، عادلانه او معقوله لار ده چې له افغانستان سره د بېثباتۍ، ناامنۍ او جګړې په پای ته رسولو کې مرسته او د هېواد په چارو کې د پردیو د لاسوهنې مخنیوی کوي.
د اسلامي حزب مشر ګلبدین حکمتیار تېره ورځ د جمعې لمانځه د خطبې پر مهال ویلي چې افغانستان د وروستیو پنځو لسیزو سیاسي او نظامي مخالفتونو پای ته رسولو او له جګړې خلاص او متحد هېواد جوړېدو لپاره، درې بدیلونه او انتخابونه لري.
هغه ویلي، د ټولشموله حکومت پر جوړېدو ټینګار، هماغه راز چې ځینې افغان ډلې او د هغوی ملاتړي هېوادونه یې غواړي او په مکرر ډول یې د مخکې شرط په توګه مطرح کوي.
نوموړی د دویم انتخاب په اړه وايي: «د یوه لوري پر بشپړ تسلط ټینګار، د یوې ډلې تر چتر لاندې د واک انحصار او د نورو ډلو تسلیمي او تسلیمېدل او یواړخیز تسلط ته غاړه اېښودل او د هرې مخالفې نظامي، فکري او سیاسي ډلې ځپل دي. لکه څرنګه چې زموږ په هېواد کې له ډېر پخوا راهیسې معمول دی چې یو شخص، یوې کورنۍ، یوې قبیلې او یوې سیاسي او فکري ډلې خپل انحصاري حکومت جوړ کړی او نور یې اطاعت او تسلیمۍ ته اړ کړي او ځپلي یې دي، خو تاریخ شاهد دی چې دغه ټول استبدادي حکومتونه یا له بهره تحمیل شوي او په هېواد کې يې د نظامي ملاتړ له لارې حکومت کړی او یا اجنبي ته تسلیم شوی د پردیو په مرسته یې د خپل رقیب او سیال د ځپلو په لټه کې پاتې شوي چې پایله یې له ویجاړۍ او جګړې پرته بل څه نه وه؛ لکه څرنګه چې موږ د درې ځله اشغال (بریتانوي، شوروي اتحاد او د امریکا متحده ایالاتو) په دوران کې د دغه ډول حکومتونو شاهدان وو؛ هر یو یې د خپلو حریفانو د له منځه وړلو په لټه کې وو او د دې نامعلوم هدف د ترلاسه کولو لپاره یې له اجنبیانو سره لاس یو کړی او د بهرنیو ځواکونو له لوري یې د هېواد اشغال او یرغل لپاره لاره پرانیسته.»
هغه ويلي، درېيم بديل له شک پرته واقعي، عادلانه او معقوله حل لاره ده او له افغانستان سره د بېثباتۍ، ناامنۍ او جګړې ختمولو کې مرسته کوي او د هېواد په چارو کې د بهرنۍ لاسوهنې مخه نيسي، يوازې دا ده چې افغانان له یو بل سره کېني، د دایمي او عادلانه سولې ترلاسه کولو لپاره په صادقانه او بې شرطه خبرو اترو کې برخه واخلي.
حکمتیار زیاتوي: «د خبرو اترو اصلي موضوع او اجنډا باید د واک وېش نه، بلکې یوازې دا وي چې د یوې معتبرې او تصمیمنیوونکې جرګې جوړول وي چې ملي اجماع تمثیل کړي او غړي یې د ملت رښتیني استازي وي، د ټولو مهمو ملي قضیو په تړاو د وروستۍ پرېکړې صلاحیت ولري او د ملت فرد فرد باید د هغه متابعت وکړي، د ملي اجماع په دغه ممثله مجمع کې د هېواد د نوي اساسي قانون او د نظام څرنګوالي او د هغه د کورنيو او بهرنيو سياستونو په اړه وروستۍ پرېکړه وشي.»
د هغه په وينا، هره هغه ډله چې له دې طرحې سره مخالفت او پر دوو نورو بديلونو ټينګار کوي او د جګړې او زور لاره خپلوي، لازمه ده چې يوه مناسبه حل لاره ورته ولټول شي او ملت يې له شره وژغورل شي.
هغه وايي: «ټول باید پوه شي او درک کړي چې له خپلو هېوادوالو سره جګړه، هغه هم د اجنبیانو د مټ په زور او د اجنبي پر وړاندې شرمېدونکې تسلیمۍ په قیمت، د یوه شریف او هوښیار انسان کار نه دی او هیڅ عاقل انسان ترې تمه نه شي کولای، تېرې ترخې او خونړۍ تجربې کافي دي چې باید له تکراره یې ډډه وشي.»
هغه ویلي چې هیڅوک نه شي کولای پر جګړې د ټینګار او د واک انحصار کولو له لارې خپل «پلید» اهداف ترلاسه کړي.
غړيYou need to subscribe to view the full article. Please login or register a new account.
