قلعهنو (پژواک، ۵ لېندۍ ۱۴۰۱): د بادغیس یو شمېر اوسېدونکي په دغه ولایت کې د سونتوکو له لوړې بیې شکایت کوي او وايي، تراوسه یې د ژمي لپاره سونتوکي نه دي اخیستي.
د بادغیس اوسېدونکي په ژمي کې د خپلو کورونو ګرمولو لپاره له لرګيو، د ارې بور، ډبرو سکرو، د پستې له پوټکي او اوبلن ګاز څخه استفاده کوي.
د یاد ولايت د اوسېدونکو په وينا، مخکې د یو خروار لرګیو بيه ۷ زره افغانۍ وه، خو اوس دا کچه شاوخوا ١٢زره افغانيو ته رسېدلې ده او دغهراز مخکې به یو من د ډبرو سکاره په ٦٠ افغانۍ، خو سږ کال په ۱۲۰ افغانۍ پلورل کېږي.
دوی وايي، په تېرو کلونو کې د یو پلاستیک وښو بیه ۳۵۰ افغانۍ وه، خو اوس ۷۰۰ افغانیو ته رسېدلې ده.
د قلعهنو ښار اوسېدونکي علياحمد پژواک خبري اژانس ته وويل، د ژمي په رانږدې کېدو سره د سونتوکو بيې لوړې شوې او دوى يې د پېرلو توان نه لري.
د نوموړي په خبره، د دغه ولايت د ډېرى اوسېدونکو اقتصاد کمزورى دى او د سونتوکو د بيو لوړېدو، خلک له ستونزو سره مخ کړي دي.
هغه له حکومتي چارواکو غواړي چې دې برخې ته پاملرنه وکړي او د سونتوکو د بیو لوړېدو مخه ونیسي.
هغه زياته کړه: «د بادغيس د خلکو اقتصاد کمزورى دى، موږ نه شو کولاى چې د سونتوکي لکه د پستې پوست، لرګي او نور واخلو.»
د قلعهنو بل اوسېدونکى سيد عبدالجليل وايي، سږ کال د خوراکي توکو د بيو ترڅنګ، د سونتوکو بيې هم د پام وړ لوړې شوې دي.
نوموړی زياتوي، خلک د سونتوکو پېرلو وس نه لري او د ژمي موسم په نږدې کېدو دی.
هغه له حکومته داسې غوښتنه کوي: «هره اوونۍ څلوېښت ميليونه ډالر هېواد ته راځي؛ ولې د خوراکي او سونتوکو بيې نه راټيټوئ، که وضعيت همدا ډول دوام وکړي، خلک به په ژمي کې له ګڼو ستونزو سره مخ شي.»
په ورته مهال، په بادغيس کې د لرګیو یو پلورونکى حاجي عبدالوهاب سادات تاييدوي چې د تېر کال په پرتله سږ د سونتوکو بيه د پام وړ لوړه شوې ده.
سادات زیاتوي، سږ کال د وچکالۍ له امله لږ سونتوکي بازار ته عرضه شوي او خلک هم د پېرلو لپاره یې څه نه لري.
سادات وويل: «په تېرو کلونو کې د یو من لرګیو بيه ٨٠ افغانۍ وه، سږ کال دغه بیه ١٢٠ افغانيو ته لوړه شوې او خلک هم د هغه د پېرلو لپاره پيسې نه لري.»
له دې ټولو سره سره، د قلعهنو ښاروالۍ اداره که څه هم د سونتوکو د بيو لوړوالى تاييدوي خو وايي، وچکالي د دې لامل شوې چې خلک په کافي اندازه سونتوکو ته لاسرسی ونه لري.
د قلعهنو ښاروال مولوي نظرمحمد وثيق له پژواک خبري اژانس سره په مرکه کې وويل، د ښاروالۍ، امنيې قوماندانۍ، ولايت مقام او نورو اړوندو ادارو یو ټیم تل د بازار نرخونه څاري او اجازه نه ورکوي چې نرخونه له دې لوړ شي.
د قلعهنو ښاروالۍ سرپرست زياته کړه: «وچکالي او په شاوخوا سيمو کې د لرګيو کمښت د دې لامل شوى چې د سونتوکو بيې له لسو تر شل افغانيو لوړې شي چې دا طبیعي ده، خو موږ د بيو څارنې لپاره يو ټيم جوړ کړى څو اجازه ورنه کړي چې نرخ نور هم لوړ شي.»
Visits: 10
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن