مزارشریف (پژواک، ۷ لېندۍ ۱۴۰١): د بلخ د کرنې ریاست مسوولین وایي، سږ کال کال د دغه ولایت پر ۱۲۰ هکټار ځمکه زعفران کرل شوي چې ورسره یې د حاصلاتو کچه هم لوړه شوې ده.
د بلخ د کرنې او اوبو لګولو ريیس شمسالدین خالد د لېندۍ په ٧مه پژواک خبري اژانس ته وويل چې سږ کال د دغه ولایت په چهاربولک، چمتال، بلخ، نهرشاهي، دولتاباد او دهدادي ولسوالیو کي پر ۱۲۰ هکټار ځمکه زعفران کرل شوي دي.
د هغه د معلوماتو له مخې، تېر کال په دغه ولايت کې ٨٠ هکټاره زعفران کرل شوي وو او ١٥٠ کيلوګرام حاصل یې درلود.
هغه وويل چې سږ کال د زعفرانو حاصلاتو کچه ٢٥٠ کيلوګرامه اټکل شوې چې د تېر کال په پرتله ٦٠ سلنه زياتوالى ښيي.
په همدې حال، د بلخ د زعفرانو کروندګر او پروسسکوونکي بلخ د زعفرانو د کر لپاره مناسب ولایت ګڼي.
په بلخ کې د نورس په نوم د زعفرانو پروسس او تولید شرکت مدیر اسدالله عابر پژواک ته وويل چې د دغه ولایت په یو شمېر ولسوالیو کې د زعفرانو کښت ښه پایله ورکړې او د دغه محصول حاصلات هم د تېرو کلونو په پرتله ډېر شوى دى.
بلخ کې د مزار زعفران ټولنې عامل مدیر منیرشاه وایي، دا مهال بلخ د زعفرانو په برخه کې د پرمختګ په حال کې دی او راتلونکي کې کولای شي د هرات ولایت له زعفرانو سره سیالي وکړي.
بلخوا د زعفرانو پروسس شرکتونو یو شمېر کارکوونکي خوښ دي چې له دې لارې ورته د کارکولو فرصتونه برابر شوي دي.
د يادو کارکوونکو له ډلې مژدې پژواک ته وويل، خوښه ده چې له دې لارې ورته د کار کولو فرصت برابر شوی خو زياتوي چې دوی یوازې د یوې میاشتې لپاره د کار کولو دغه فرصت ترلاسه کړی دى.
هغې زياته کړه چې حکومت بايد دوى ته د اوږدې مودې کار کولو زمينه او فرصت برابر کړي.
د يادونې ده، د افغانستان زعفران په نړۍ ښه شهرت لري چې په دې وروستيو د ډېرو ولايتونو کروندګرو يې کرنې ته مخه کړې ده.
Visits: 44
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن