<p style="text-align: justify;">کابل (پژواک، ۸ لېندۍ ۱۴۰۱): په واده کې د ډېر لګښت مخنیوي او د دغه فرهنګ دودولو په موخه، په کابل ښار کې د ۵۶ جوړو د واده ډلهییز مراسم ترسره شول.</p>
<p style="text-align: justify;">دغه مراسم د «امام علي» خیریه فرهنګي بنسټ له لوري د یادو جوړو د سلګونو خپلوانو په ګډون، نن د کابل ښار د دشت برچي په «قصر دبۍ» هوټل کې ترسره شول.</p>
<p style="text-align: justify;">د یاد بنسټ غړي محمدنعیم عليزاده د واده په دغو مراسمو کې وویل چې نن د ۵۶ جوړو د واده ګډ مراسم جوړ شوي، په ټوله کې د هرې جوړې لپاره شاوخوا ۲۸ زره افغانۍ لګول شوې دي.</p>
<p style="text-align: justify;">د هغه په خبره، هر خاوند او مېرمنې ته د کور او جهیز د اړتیا وړ ۳۲ قلمه وسایل ورکړل شوي دي.</p>
<p style="text-align: justify;">هغه زیاته کړه، دا دویم ځل دی چې د یاد بنسټ له لوري د واده دغه ډول ډلهییز مراسم ترسره کېږي.</p>
<p style="text-align: justify;">عليزاده وايي، د واده یاد ډلهییز مراسم د دغه فرهنګ د ترویج او له هغو ځوانانو سره د مرستې په پار ترسره کېږي چې په یوازې ډول د واده کولو لګښتونه نه شي پوره کولای.</p>
<p style="text-align: justify;">په یادو مراسمو کې یوې ناوې راضیې هاشمي پژواک خبري اژانس ته وویل، دوه کاله کېدل چې کوژده یې کړې وه، خو کوژدن یې د اقتصادي ستونزو له امله نه شوای کولای چې واده وکړي.</p>
<p style="text-align: justify;">هغه په یادو مراسمو کې له ګډونه خوښه ده او وايي: «ډېر د خوښۍ ځای دی، داسې ځوانان لرو چې دا ډول مراسم ترسره او د لوړو لګښتونو مخنیوی کوي.»</p>
<p style="text-align: justify;">هغې له نورو ځوانانو وغوښتل چې که په یوازې توګه د واده ترسره کولو توان نه لري، د واده په دغه ډول ګډو مراسمو کې دې ګډون وکړي.</p>
<p style="text-align: justify;">نوموړې هیلهمندي وښوده چې دغه ډول محفلونه پر یو فرهنګ بدل شي او ځوانان په کم لګښت د واده مراسم ترسره کړي.</p>
<p style="text-align: justify;">په یادو مراسو کې یو زوم غلام سخي حیدري وویل: «نن مو د واده په دغه ډلهییزو مراسمو کې ګډون کړی، ډېر خوشحاله یم، د دغه ډول مراسمو ترسره کول د بېځایه لګښتونو مخنیوی کوي.»</p>
<p style="text-align: justify;">هغه هیلهمندي وښوده چې دغه ډول فرهنګ په هېواد کې نور هم دود شي.</p>
