<p style="text-align: justify;">مزارشریف (پژواک، ۸ مرغومی ۱۴۰۱): د بلخ ولايت د چمتال ولسوالۍ اوسېدونکي وايي، د علیزو او ارزانکار کلیو ترمنځ د سيند پر سر د پله نشتوالي دوی له ستونزو سره مخ کړي دي او بايد پاملرنه ورته وشي.</p>
<p style="text-align: justify;">دوى وايي، د <em>پُل</em> نشتون له امله اړ دي چې خپل نقليه وسايط د کښتۍ په وسيله له سيند څخه پورې باسي، خو د شپې له مخې دغه اسانتيا هم نه وي.</p>
<p style="text-align: justify;">د يادې ولسوالۍ د علیزو کلي اوسېدونکي عبدالغفور پژواک خبري اژانس ته وويل چې د علیزو او ارزانکار سیمو ترمنځ لار چهاربولک او چمتال ولسوالۍ سره نښلوي او پر دغه لار د پله نشتوالي له ګڼو ستونزو سره مخ کړي دي.</p>
<p style="text-align: justify;">دى وايي: «د څارويو او نقلیه وسايطو د انتقال لپاره له کښتۍ څخه کار اخلو، د شپې له مخې کښتۍ هم نه وي او ډېرى وخت موټر او څاروي له کښتۍ څخه اوبو ته غورځېږي.»</p>
<p style="text-align: justify;">دغهراز د چمتال د نوښار کلي اوسېدونکی مولوي محمد قاسم بیا وایي چې د یادو سیمو ترمنځ د پله نشتوالي له امله ډېرى وخت ناروغان پر وخت روغتون ته نه رسېږي او په لار کې خپل ژوند له لاسه ورکوي.</p>
<p style="text-align: justify;">د یادې ولسوالۍ بل اوسېدونکى ملا احمد جان هم وايي چې د <em>پُل</em> نشتوالي له ګڼو ستونزو سره مخ کړي دي او بايد پاملرنه ورته وشي.</p>
<p style="text-align: justify;">دى وايي: «په واوره او باران کې کښتۍ نه وي، عاجل مريضان شفاخانې ته نه شو بيولاى دا يو لوى مشکل دى بايد حل شي.»</p>
<p style="text-align: justify;">د يادې ولسوالۍ يو شمېر نورو اوسېدونکو هم ورته څرګندونې وکړې او له حکومته يې د ياد سيند پر سر د پله جوړولو غوښتنه وکړه.</p>
<p style="text-align: justify;">بل لورته، حکومتي مسوولين د يادې ستونزې پر حل ټينګار کوي.</p>
<p style="text-align: justify;">د چمتال ولسوال مولوي نورالله حُمام پژواک ته وويل چې د سيند پر سر د پله نشتون ترڅنګ په دې ولسوالۍ کې نورې ستونزې هم شته چې د حل لپاره يې هلې ځلې روانې دي.</p>
<p style="text-align: justify;">ده پر حکومتي مشرانو غږ وکړ چې د چمتال ولسوالۍ خلکو د ستونزو حل لپاره اړينې هڅې وکړي.</p>
<p style="text-align: justify;">دا په داسې حال کې ده چې د تېر حکومت پرمهال د ياد سيند پر سر يو پل جوړ شوى، خو خلک وايي چې له سیمې یې د پله د لرېوالي له امله دوى ترې په ښه توګه استفاده نه شي کولاى.</p>
