کابل (پژواک، ۱۱ مرغومی ۱۴۰۱): د یوه چینایي شرکت مشر په افغانستان کې د اوبو بندونو جوړولو او د انرژۍ تولید په برخه کې پانګونې ته لېوالتیا ښودلې ده.
د اوبو او انرژۍ وزارت په خبرپاڼه کې راغلي چې د دغه وزارت سرپرست ملا عبداللطیف منصور په تاشکند کې د چین هېواد د «CRBC» شرکت له رئيس او یو شمېر تخنیکي مسؤولینو سره کتلي دي.
سرچينې لیکلي، د یاد شرکت مسؤولینو په افغانستان کې د اوبو بندونو جوړولو او د انرژۍ تولید په برخه کې پانګونې سره لېوالتیا څرګنده کړه.
په خبرپاڼه کې راغلي، د اوبو او انرژۍ وزارت سرپرست د یادو پانګهوالو له لېوالتیا څخه خوښي وښوده او دوی ته یې بلنه ورکړه چې افغانستان ته راشي او د اوبو بندونو جوړولو او د انرژۍ تولید په برخه کې د پانګونې په اړه د اوبو او انرژۍ وزارت له اداري او تخنیکي مسؤولینو سره له نږدې خبرې وکړي.
هغه ویلي: «مونږ دې ته تیار یو چې د پانګونې لپاره زمینه درته مساعده کړو.»
د سرچينې د معلوماتو له مخې، یادو پانګهوالو هم ومنله چې افغانستان ته راشي او د اوبو بندونو جوړولو او د انرژۍ تولید په برخه کې پانګونه وکړي.
