ترینکوټ (پژواک، ۳ سلواغه ۱۴۰۱): د ملګرو ملتونو د ماشومانو ملاتړ صندوق/ UNICEF له لوري د اروزګان مرکز ترینکوټ په دوو ښوونځیو او یوه روغتیايي مرکز کې د ۱۰ میلیون افغانیو په لګښت د برېښنا، څښاک پاکو اوبو رسولو او تشنابونو جوړولو درې پروژې بشپړې شوې.
په سويلي زون کې د یونیسف مسوول فرانسیس بوسیکو بوتیچی/ Francis Busiku Butichi د دغو پروژو د پرانیستې پر مهال وویل، په دوو ښوونځیو او یوه روغتیايي مرکز کې یادې شوې درې پروژې په دې موخه پلې شوې څو مېندې او ماشومان د څښاک پاکو اوبو او نورو اسانتیاوو ته لاسرسی پیدا کړي.
هغه زیاته کړه، پر دغو پروژو- چې د برېښنا، د څښاک پاکو اوبو رسولو او تشنابونو جوړول په کې شامل دي، لس میلیون افغانۍ لګښت راغلی دی.
دی وايي، یونیسف پلان لري د اروزګان په ټولو ۵۶ روغتیايي مرکزونو او لسګونو ښوونځیو کې د څښاک اوبو رسولو په ګډون یو شمېر خدماتي پروژې پلې کړي.
نوموړي له خلکو وغوښتل چې له بشپړو شوو پروژو ساتنه وکړي او په سمه توګه ګټه ترې واخلي.
د اروزګان د عامې روغتیا رییس ډاکټر محمدالله روحاني وویل، لا هم د دغه ولایت ۴۲ روغتیايي مرکزونه ودانۍ نه لري او خپلې چارې په کرايي کورونو کې مخ ته وړي.
ده له یونیسف ادارې وغوښتل چې روغتیايي مرکزونو ته د ودانیو په جوړولو کې هم مرسته وکړي.
د دغه ولایت د پوهنې رییس مولوي حقنما د یونیسف له ادارې مننه وکړه چې تل یې په ښوونځيو کې د اوبو او برېښنا اسانتیاوو برابرولو تر څنګ له زده کوونکو سره د درسي موادو او ښوونکو ته د معاشونو په ورکولو کې مرسته کړې ده.
ده زیاته کړه، په اروزګان کې د ۳۲ ښوونځیو ودانۍ په تېرو جګړو کې نړېدلي، په کار ده چې یاده نړۍواله اداره یې په بیا جوړولو کې د دوی لاسنیوی وکړي.
د یادونې ده چې تېره اوونۍ هم د ملګرو ملتونو د ماشومانو ملاتړ ادارې له لوري په دغه ولایت کې د ۱۴ میلیون افغانیو په لګښت څلور پروژې بشپړې شوې وي.
په دغو پروژو کې د اروزګان په ولایتي روغتون کې نوو زېږېدلو ماشومانو ته د ځانګړې پاملرنې څانګې جوړولو ترڅنګ د اوبو، برېښنا او ناپاکو اوبو ایستلو سیسټم فعالول شامل وو.
