کابل (پژواک، ۲۹ سلواغه ۱۴۰۱): د ملګرو ملتونو د بشري مرستو همغږۍ دفتر اوچا/ UN OCHA وايي، په افغانستان کې له تېرو درېیو کلونو راهیسې پر لهپسې وچکالۍ خلک سخت اغېزمن کړي دي او د هغو کورنیو شمېر ۱۲ سلنه ډېر شوی چې د څښاک پاکو اوبو ته لاسرسی نه لري.
د ملګرو ملتونو دغه سازمان په خپله ټویټرپاڼه کې لیکلي: «د تېرو درېیو کلونو پرلهپسې وچکالۍ افغانستان ځپلی دی.»
سرچینې زیاته کړې، وچکالۍ په تېر ۲۰۲۲ زېږدیز کال کې په افغانستان کې د څښاک اوبو ته د کورنیو اړتیا ۷ سلنه زیاته کړې او د هغو کورنیو شمېر ۱۲ سلنه ډېر شوی چې د څښاک پاکو اوبو ته لاسرسی نه لري.
یادې ادارې ویلي، په افغانستان کې ۱۴ میلیون وګړو ته د څښاک پاکو اوبو رسولو لپاره ۴۷۹ میلیون ډالرو ته اړتیا ده.
دا په داسې حال کې ده چې یادې ادارې د سلواغې په ۲۷مه د یوه ټویټ په کولو ویلي و چې په ۲۰۲۳ کې په افغانستان کې له ۱۷،۶ میلیون خلکو- چې روغتیایي مرستو ته اړتیا لري- نړۍوالو مرسته کوونکو ۱۵،۶ میلیون وګړو ته لومړیتوب ورکړی دی.
د یادې ادارې د څرګندونو له مخې، په دغه کال کې د افغانستان ۲۸،۳ میلیون وګړي مرستو ته اړتیا لري.
د یادونې ده، په افغانستان کې د تېرو کلونو وچکالیو د څښاک پاکو اوبو ته د خلکو نه لاسرسي ستونزې ترڅنګ، کرنه هم زیانمنه کړې او ناروغۍ یې ډېرې کړې دي.
Visits: 113
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن