ملګرو ملتونو په پنځو هېوادونو کې مېشتو افغان کډوالو ته د ۶۱۳ میلیون ډالرو مرستې غوښتنه وکړه

[restrict paid="true"]

اټلانټا (پژواک، ۲۳ کب ۱۴۰۱): د ملګرو ملتونو د کډوالو عالي کمېشنري (UNHCR) په روان زېږدیز کال کې په ایران، پاکستان او د منځنۍ اسیا په دریېو هېوادونو کې له افغان کډوالو سره د مرستې لپاره له نړۍوالې ټولنې د ۶۱۳ میلیون امریکایي ډالرو مرستې غوښتنه کړې ده.

په جنیوا کې د کډوالو عالي کمېشنرۍ د یوې خبرپاڼه په خپرولو د کډوالو لپاره د خپلې نوې طرحې جزئیات خپاره کړي دي.

په طرحه کې له مرسته کوونکو هېوادونو غوښتل شوي چې له افغان کډوالو خپل ملاتړ ته دوام ورکړي.

دغه راز په طرحه کې راغلي، له غوښتل شوې یادې مرستې به ۷،۹ میلیون کډوال برخمن شي چې له ډلې یې پنځه اعشاریه دوه میلیون افغان کډوال دي او له کېدونکو مرستو به یوه اندازه د دغو کډوالو کوربه هېوادونو ته ورکړل شي، څو دغو کډوالو ته خدمتونه وړاندې کړي.

د ملګرو ملتونو د کډوالو عالي کمېشنرۍ (UNHCR) ویلي، له هغو کډوالو چې مرستو ته اړتیا لري، ۷۰ سلنه هغه یې ښځې او ماشومان دي.

په خبرپاڼه کې راغلي، د یادې مالي مرستې غوښتنه یې په ۲۰۲۳ کال کې د افغانستان په پنځو ګاونډیو هېوادونو، ایران، پاکستان، تاجکستان، ترکمنستان او ازبکستان کې د افغان کډوالو ملاتړ لپاره کړې ده.

سرچینې زیاته کړې، په ۲۰۲۲ میلادي کال کې دوی د ورته مرستې غوښتنه کړې وه، خو له غوښتل شوې مرستې یوازې ۵۲ سلنه یعنې له ۶۳۲ میلیون ډالرو  ۳۲۱ میلیون ډالر مرسته ترلاسه کړه.

د دې کمېشنرۍ په اعلامیې کې ویل شوي، له شته نیمګړتیاوو سره سره دوی توانېدلي د سیمې په هېوادونو کې له ګڼو افغان کډوالو ملاتړ وکړي او له کوربه هېوادونو سره هم مرسته وکړي.

د ملګرو ملتونو د معلوماتو له مخې، دا مهال تر ټولو ډېر افغان کډوال  په پاکستان او ایران کې مېشت دي.

[/restrict]