قلعهنو (پژواک، ۱۶ وری ۱۴۰۲): د بادغیس ولایت یو شمېر اوسېدونکي د موسمي اورښتونو له امله د قلعهنو ښار د سیند ویجاړیو زیاتېدو په اړه اندېښنه ښيي او له مسوولینو غواړي، څو د دغه سیند د غاړو تحکیماتي چارې دې پیل کړي.
هر کال د پسرلي موسم په رارسېدو او د بارانونو په زیاتېدو سره، د قلعهنو ښار د سیند دواړو غاړو اوسېدونکي د سېلاب راوتلو له امله په وېره کې وي.
هغه سېلابونه چې د بند سبزک له لوړو غرونو راوځي، د قلعهنو ښار له سينده په تېرېدو سره د دواړو غاړو کورونه ګواښي.
په ورته مهال، د باغیس ځیني اوسېدونکي د ښار سیند د غاړو تحکیمکارۍ غوښتنه کوي او له حکومته غواړي څو د خلکو د کورونو ترڅنګ د استنادي دېوالونو په جوړولو سره له سېلابه د دوی ژوند وژغوري.
امیرمحمد چې یاد سیند ته نږدې اوسېږي وايي، د استنادي دېوالونو نشتوالي له امله د سیند غاړې ډېری کورونه ویجاړ شوي او یا د له منځه تلو له ګواښ سره مخ دي.
هغه له سرپرست حکومته غواړي چې په دې اړه پاملرنه وکړي او د سیند دواړو لورو ته استنادي دېوالونه جوړ کړي.
د یاد ولایت بل اوسېدونکی جواد هم له حکومته غواړي چې د سیند دواړو غاړو ته دې استنادي دېوالونه جوړ کړي، څو د ناوړه پېښو له رامنځته کېدو مخنیوی وشي.
د هغه په خبره، د دواړو غاړو اوسېدونکي خوندي نه دي او هر کال د بارانونو موسم پر مهال په وېره کې ژوند کوي.
په ورته مهال، د باغیس مدني فعالان هم په دې برخه کې د دولت د پاملرنې غوښتنه کوي.
مدني فعال عبدالرحیم عاطف وايي، حکومت باید د قلعهنو ښار د سیند غاړو تحکیمکارۍ پروژې لګښت د ۱۴۰۲ کال په بودجه کې شامل کړي.
هغه وايي، دغه سیند ته د نه پاملرنې په صورت کې به د سېلاب له امله د دوی کورونه له منځه لاړ شي.
بلخوا، د باغیس د والي ویاند احمدجان حنظله د یادي پروژې د کار پر پیل او اهمیت د ټینګار ترڅنګ وویل، هڅه کوي راتلونکی کال د ښار د سیند غاړو تحکیمي کارونه بشپړ کړي.
د حنظله په خبره، د دې پروژې په بشپړېدو سره به د یاد سیند دواړو لورو کورونه د سېلاب له ګواښه وژغورل شي.
که څه هم د یاد سیند د ځینو برخو تحکیمکارۍ چارې د تېر حکومت پر مهال ترسره شوې وې، خو په ډېری برخو کې یې تر اوسه کوم کار نه دی شوی.
Views: 10
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن