کابل (پژواک، ۱ غبرګولی ۱۴۰۲): د افغانستان کرکټ بورډ له لوري یوه سپورټي کمپلکس ته د شل اووریز لیګ ترسره کولو لپاره د لومړۍ درجې جواز ورکړل شو.
د افغانستان کرکټ بورډ د کورني کرکټ مشر نظیمجار عبدالرحیمزي نن په کرکټ بورډ کې په دې تړاو جوړه شوې غونډه کې وویل، کرکټ بورډ به خصوصي سکټور ته د کرکټ په برخه کې تخنیکي او نورې اسانتیاوې برابرې کړي.
هغه زیاته کړه چې د نورې نړۍ په پرتله خصوصي سکټور په افغانستان کې د کرکټ په برخه کې کمه پانګونه کړې ده.
نوموړي وویل: «نن مونږ ایوبي سپورټ کمپلکس ته د اریانا سوپر لیګ ترسره کولو لپاره د لومړۍ درجې جواز ورکړ.»
هغه زیاته کړه، یوه لیګ ته د لومړۍ درجې جواز ورکول په دې معنا ده چې په دغه لیګ کې د افغانستان کرکټ بورډ ټول لوبغاړي لوبېدلی شي.
عبدالرحیمزي وویل، د اریانا سوپر لیګ په شل اووریزه بڼه ترسره کېږي او د کرکټ بورډ اړوند ټول لوبغاړي، د ملي لوبډلې، ۱۹ کلن، تقاعد شوي، د کورني کرکټ قراردادي او نور لوبغاړي پکې برخه اخیستلی شي.
هغه وایي چې د یاد لیګ د لوبغاړو لپاره مختلفې کټګورۍ جوړې شوې او د هرې یوې لپاره ځانګړي فیسونه ټاکل شوي دي.
نوموړی وایي، د یاد لیګ ترسره کولو کره نېټه نه ده معلومه خو ښايي د روان کال په جولای میاشت کې ترسره شي.
عبدالرحیمزي د یوې پوښتنې په ځواب کې وویل، کرکټ بورډ هڅه کوي چې د افغانستان سوپر لیګ (APL) او شپږیزه غوره لیګ سیالۍ د روان کال په نومبر او ډسمبر میاشتو کې ترسره کړي؛ ځکه له دې مخکې د ملي لوبډلې ټول لوبغاړي بوخت دي.
همدارنګه په یاده غونډه کې د ایوبي کمپلکس مسوول عبدالطیف ایوبي وویل چې دغه لیګ به په ډېره بڼه ترسره کړي.
نوموړی وایي، دوی ته د کرکټ بورډ له لوري د لسو کلنو لپاره لومړۍ درجه جواز ورکړل شو.
هغه زیاته کړه چې په یاد لیګ کې به د هېواد له پنځو زونونو څخه شپږ لوبډلې برخه ولري.
Visits: 70
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن