ښرنه (پژواک، ۲۴ چنګاښ ۱۴۰۲): د پکتيکا په اورګون ولسوالۍ کې د درېيو ولایتونو د پنځوسو لوبډلو ترمنځ د فوټبال سیالۍ پيل شوې.
د پکتیکا د بدني روزنې او ورزش امریت له خوا پژواک خبری اژانس ته په رالېږل شوې خبرپاڼه کې راغلي، د اورګون فوټبال کمېټې له خوا د یووالي په نوم دا سیالۍ به یوه نیمه میاشت دوام وکړي.
د اورګون فوټبال کمېټې مشر ناصر ملنګیار پژواک ته وویل، دا سیالۍ د بالشو لېسې په لوبغالي کې ترسره کېږي چې په یوه نیمه میاشت کې به د درېیو ولایتونو ۵۰ لوبډلې یو بل سره لوبه وکړي.
هغه زياتوي: «د دې ټورنمنټونو په جوړولو کې د اورګون فوټبال کمېټه او د اورګون ځوانان او سوداګر مرسته کوي چې د ځوانانو ساتېري لپاره یو ښه فرصت جوړېږي.»
د هغه په وینا، د لوبو له برکته ډېر ځوانان له نشو او نور ناسمو لارو څخه راګرځېدلي او دې سیالۍ سره ډېرو خلکو ته د کاروبار زمینه هم برابره شوې ده.
هغه وايي، د یادې کمېټې له خوا په تېرو لسو کلونو کې دې ته ورته سیالۍ ترسره شوې دي.
په دې سیالۍ کې لوبېدونکي لوبغاړي وایې، په اورګون کې د فوټبال مینهوال ډېر دي، هر وخت د خلکو لخوا داسې سیالۍ ترسره کېږي، خو هیله لري چې د فوټبال فدراسیون هم دې برخې ته پاملرنه وکړي.
اسلام الدین او بختیار دوو لوبغاړو پژواک اژانس ته وویل: «له مسوولینو مو غوښتنه ده چې دې لوبغاړو ته دې د هېواد په کچه سیالۍ جوړې شي، څو د دغو ځوانانو له ډلې وړ لوبغاړي ملي لوبډلې ته لار پیدا کړي.»
د یادونې ده، د اورګون فوټبال کمېټې لخوا د تېر کوچني اختر په مناسبت هم ورته سیالۍ جوړې شوې وې چې له پکتیکا، پکتیا او خوست ولایتونو څخه بېلابېلو لوبډلو پکې برخه اخیستې وه.
