تېرو درېیو میاشتو کې د تورخم له لارې څه باندې ۲۰ زره کسان د درملنې لپاره پاکستان ته تللي

جلال‌اباد (پژواک، د زمري لومړۍ نېټه ۱۴۰۲): ننګرهار کې مسوولین وايي، پاکستان ته له پاسپورټ پرته د ناروغانو د لېږد ځانګړي کمېسیون معرفي کولو له لارې په تېرو درېيو مياشتو کې شاوخوا ۲۰ زره ناروغان او د هغوی پایوازان دغه هېواد ته تللي دي.

د ناروغانو د لېږد ځانګړی کمېسيون هره ورځ په جلال‌اباد ښار کې د ناروغانو کتنه کوي او بيا د اړتيا په صورت کې پاکستان ته د تلو اجازه‌لیک (ټوکن) ورکوي.

د تورخم کميسار مفتي عصمت‌الله یعقوب وايي، په تېرو درېيو میاشتو کې د تورخم بندر له لارې شاوخوا ۲۰ زره او ۴۰۰ ناروغان او پایوازان پاکستان ته د درملنې په موخه پرته له ویزې د ځانګړي سند یا ټوکن په درلودو اوښتي دي.

نوموړي وويل، په یادو ناروغانو کې زیاتره داسې کسان وو چې په هېواد کې دننه يې درملنه ناشونې وه.

کميسار وايي: «د دې لپاره چې ناروغان په تورخم دروازه کې له ستونزو سره مخ نه شي او په قانوني شکل کوزې پښتونخوا ته واوړي، دوه مرحلې مو ورته ټاکلې، لومړۍ مرحله د عامې روغتیا اړوند کمېسیون له خوا مستحقو ناروغانو ته د ریفرشیټ ورکول دي او په دویمه مرحله کې په تورخم کلینیک کې د ناروغانو چک او کتنه ترسره کېږي چې دلته بیا له کتنې وروسته مستحقو ناروغانو ته پښتونخوا ته د اوښتو اجازه او ټوکن ورکول کېږي.»

مفتي عصمت‌الله یعقوب زیاتوي، په دې برخه کې یې د فساد مخه نیولې او هیڅوک نه شي کولی چې له چا پاکستان ته د تورخم له لارې د اوښتو په نوم پیسې او رشوت واخلي.

ناروغ لرونکي هم په تورخم کې له پاسپورټ او ويزې پرته د ناروغانو د لېږد دغه بهير ګټور ګڼي.

محمدحليم چې يوه اونۍ يې دې پروسې ته انتظار کړی او تازه يې خپل ناروغ ته اجازه‌ليک (ټوکن) اخیستی وايي، که د ناروغانو شمېر ډېر نه وي نو پر وخت نوبت وررسېږي.

يو بل ناروغ لرونکی عبيدالله وايي، روغتيا رياست بايد له پاکستاني چارواکو سره د ناروغانو د شمېر ډېرېدو برخه کې هم خبرې وکړي.

خو مسوولين وایي، اوس هم د اړتيا تر کچې ناروغانو ته د تګ اجازه ورکول کېږي.

د تورخم کميسار وايي، په ورځني ډول له ۱۱۰ څخه تر ۱۳۰ پورې ناروغانو ته د تګ زمينه برابرېږي.