د بلخ والي: د اقتصادي پرمختګ په موخه له ټولو هېوادونو سره ښې اړيکې غواړو

مزارشریف (پژواک، ۱۹ زمری ۱۴۰۲): د بلخ والي محمدیوسف وفا وایي چې اسلامي امارت د اقتصادي پرمختګ په موخه له ټولو هېوادونو سره ښې اړیکې غواړي او هیچا ته اجازه نه ورکوي چې د افغانستان خاوره د بل کوم هېواد خلاف وکاروي.

د بلخ ولایت مقام د رسنیو او معلوماتو مرکز له خوا په خپره شوې خبرپاڼه کې راغلي چې د بلخ د والي محمدیوسف وفا په مشرۍ یو پلاوی د سوداګریزو او ترانسپورټي ستونزو د حل په موخه ازبکستان هېواد ته په رسمي سفر تللی دی.

د خبرپاڼې له مخې، د بلخ له والي سره په دغه سفر کې د دغه ولایت د علماوو، روغتیا، بهرنیو چارو، صنعت او سوداګرۍ، ګمرک، اوسپنې پټلۍ رییسان او امنیه قوماندان ملتیا کوي.

سرچینه زیاتوي چې افغان پلاوي د افغانستان لپاره د ازبکستان له ځانګړي استازي عصمت‌الله اېرګشوف سره لیدلي دي.

خبرپاڼه کې راغلي چې په دې لیدنه کې د افغانستان او ازبکستان د سوداګرۍ، صادراتو او وارداتو ودې او ستونزو د حل په موخه خبرې وشوې.

خبرپاڼې د والي محمدیوسف وفا له قوله ویلي، د اسلامي امارت ټول مسوولین له نورو هېوادونو سره د اقتصادي پرختګ په موخه ښې اړیکې غواړي او د همدې لپاره به یوه کمیټه جوړه شي څو د ازبکستان او افغانستان ترمنځ د سوداګرۍ او ترانسپورټ برخو کې شته ستونزې هواري کړي.

د بلخ والي دغه راز ویلي، هیچا ته اجازه نه ورکوي چې د افغانستان خاوره د بل چا خلاف استعمال شي، دوی پر خپله دې ژمنه ولاړ دي او له نورو هم د همدغسې تعامل هیله لري.