<p style="text-align: justify;">کابل (پژواک، ۵ وږی ۱۴۰۲): د ملګرو ملتونو د ماشومانو ملاتړ صندوق وايي، سبا د افغانستان په شپږو ولایتونو کې د ګوزڼ واکسین څلور ورځنی کمپاین پیلېږي.</p>
<p style="text-align: justify;">د ملګرو ملتونو د ماشومانو ملاتړ صندوق (UNICEF) مطبوعاتي مسوول کمالشاه سید پژواک خبري اژانس ته وویل، دغه کمپاین سبا (د وږي ۶مه) په بلخ، جوزجان، سمنګان، سرپل، فاریاب او اروزګان ولایتونو کې پیلېږي.</p>
<p style="text-align: justify;">دی وایي، د دغه څلور ورځني کمپاین په لړ کې به له پنځو کلونو کم عمره شاوخوا ۱،۶ میلیون ماشومان واکسین شي.</p>
<p style="text-align: justify;">تېره اونۍ د هېواد په پاتې ۳۰ ولایتونو کې د ګوزڼ واکسین د څلور ورځني کمپاین پر مهال څه باندې ۱۱ میلیونه ماشومان واکسین شول.</p>
<p style="text-align: justify;">دا په داسې حال کې ده چې د عامې روغتیا وزارت معلوماتو له مخې، د روان ۲۰۲۳ زېږدیز کال کې تر اوسه د هېواد په کچه د ګوزڼ ناروغۍ پنځه مثبتې پېښې ثبت شوې دي.</p>
