فراه کې یو استنادي دېوال جوړ شو او د لوګر د خروار ولسوالۍ ودانۍ جوړولو چارې پیل شوې

پل‌علم، فراه (پژواک، ۱۰ تله ۱۴۰۲): د لوګر د خروار ولسوالۍ د ودانۍ جوړېدو چارې پيل شوې او فراه کې د یوه استنادي دېوال کارونه بشپړ شول.

د کورنیو چارو وزارت مرستیال مولوي عبدالله مختار د خروار ولسوالۍ د ودانۍ بنسټ ډبرې اېښودو مراسمو کې وویل، خروار د لوګر هغه لرې پرته ولسوالي ده چې مسوولینو او کارکوونکو یې له تېرو څو کلونو راهیسې اداري چارې په نظامي کمپونو او کرایي کورونو کې ترسره کولې.

هغه زیاته کړه، د کورنیو چارو وزارت د تامیناتو معینت له لوري د خروار ولسوالۍ اداري ودانۍ پر دوه جریبه ځمکه په درېیو پوړونو کې په پاخه او اساسي ډول د شاوخوا ۲۰ میلیونه افغانیو په لګښت جوړېږي.

هغه وايي، د دې ودانۍ چارې به د شپږو میاشتو په اوږدو کې بشپړې شي.

هغه دغه راز زیاته کړه، د دې ودانۍ په جوړېدو به په اداري برخه کې د ولسوالۍ د کارکوونکو ستونزې هوارې شي او ښه خدمات به وړاندې کړي.

د لوګر والي مولوي ضیاالرحمن مدني وویل، په هېواد کې نوره جګړه پای ته رسېدلې او اوس د بیارغونې وخت دی.

نوموړي د کورنیو چازو له وزارته مننه وکړه چې د خروار ولسوالۍ لپاره یې اداري ودانۍ د جوړېدو چارې پيل کړې، خو غوښتنه کوي چې د دغه ولایت په مرکز پل‌علم او ولسوالیو کې پاتې ادارو ته د اړتیا له مخې ودانۍ جوړې کړي.

د خروار ولسوالۍ یوه قومي مشر حاجي عیدګل وویل، له دې مخکې خروار ولسوالۍ هیڅ ودانۍ نه لرله، ولسوال او ملکي کارکوونکو د امنیې قوماندانۍ له یوه نظامي مرکزه خدمات وړاندې کول.

هغه زیاته کړه، که چېرې یادې ولسوالۍ ته اداري ودانۍ جوړه شي، نو د خلکو ستونزې به په بشپړ ډول هوارې شي.

باید وویل شي، د لوګر د څرخ او ازرې ولسوالیو اداري ودانۍ هم د تېرو جګړو پر مهال ویجاړې شوې دي، خلک او مسوولین یې له حکومته د بیارغونې غوښتنه کوي.

بلخوا، د فراه د اطلاعاتو او فرهنګ رییس عبدالحی سباوون وايي، نن د دغه ولایت په خاکسفید ولسوالۍ کې د ۴۷ زره ډالرو په لګښت د یوه استنادي دېوال جوړېدو چارې بشپړې شوې.

سرچینې زیاته کړې چې دغه پروژه د ملګرو ملتونو پرمختايي ادارې (UNDP) په مالي ملاتړ او د کرنې ریاست تر څارنې لاندې د درېیو میاشتو په موده کې پلې شوې ده.

سرچینې ویلي چې یاد دېوال د خاکسفید په ننګ کلي کې جوړ شوی چې ۲۴۰ اوږدوالی او درې اعشاریه پنځه متره لوړوالی لري.

سباوون ویلي چې د دغه دېوال په جوړېدو سره د شاوخوا ۸۰۰ کورنیو ځمکې او ودانۍ د سېلابونو له خطره وژغورل شول.