<p style="text-align: justify;">نیلي (پژواک، ۱۷ لړم ۱۴۰۲): دایکنډي کې روغتیايي مسوولین وايي چې سږ مېلادي کال په دغه ولایت کې د ۲۳۱ میندو او ماشومانو مړینه ثبت شوې چې د تېر کال په نسبت ۴۷ سلنه کموالی ښيي.</p>
<p style="text-align: justify;">د دایکنډي د عامې روغتیا رییس غني صمیم پژواک خبري اژانس ته وویل چې د دوی د شمېرو له مخې، تېر مېلادي کال په دغه ولایت کې شاوخوا ۴۳۲ میندې او ماشومان مړه شوي وو چې دغه شمېر سږ کال نیمايي ته راټیټ شوی دی.</p>
<p style="text-align: justify;">هغه زیاته کړه: «روغتیايي خدمات ډېر ښه شوي، له نېکه مرغه د تېر کال په نسبت سږ کال د مور او ماشوم د مړینې کچه د ترلاسه شوو شمېرو له مخې، ۴۷ سلنه کمه شوې ده.»</p>
<p style="text-align: justify;">هغه د مور او ماشوم د مړینې کچې د ټیتېدو لامل د روغتیايي خدمتونو ښه کېدل او خلکو ته د لازم پوهاوي وړاندې کول بولي.</p>
<p style="text-align: justify;">هغه څرګنده کړه چې د دایکنډي په کچه کې د روغتیايي مسوولینو په ګډون ګرځنده ټېمونه هم فعال دي او خلکو ته روغتیايي خدمات وړاندې کوي.</p>
<p style="text-align: justify;">نوموړي ټینګار وکړ چې دوی د ټولنې تر ټولو زیان مننونکي قشر ته چې مور او ماشوم دي، روغتیايي خدمتونو وړاندې کولو ته ژمن دي او د دغه خدمتونو د لا زیاتولو هڅه کوي.</p>
<p style="text-align: justify;">هغه زیاتوي، دا چې دایکنډي یو غرنی ولایت دی نو په ځینو برخو کې ستونزې شته، خو دوی هڅه کوي څو دغه ستونزې هوارې کړي.</p>
<p style="text-align: justify;">په ورته مهال، دایکنډي کې یو شمېر ناروغلرونکي په دغه ولایت کې د روغتیايي خدمتونو له وړاندې کولو خوښ دي، خو بیا هم د مور او ماشوم د روغتیا په برخه کې له حکومته د پاملرنې غوښتنه کوي.</p>
<p style="text-align: justify;">دایکنډي کې یوه ناروغلرونکي عارف پژواک ته وویل: «مېرمن مې څو ځله د زیږون له امله په روغتون کې بستر شوه؛ ځکه ډېره کمزورې وه، اندېښمن وم، خو ډاکترانو یې شپه او ورځ مراقبت کاوه، زما د مېرمنې او ماشوم ژوند یې وژغوره.»</p>
<p style="text-align: justify;">هغه زیاته کړه چې دایکنډي یو غرنی ولایت دی او خلک له روغتیايي مرکزونو لرې دي، نو له همدې امله د ځینو ناروغیو لپاره کورنۍ درملنې ته مخه کوي.</p>
<p style="text-align: justify;">نوموړی له حکومته غواړي څو د روغتیايي مرکزونو او روغتیايي امکانانو زیاتولي برخه کې پاملرنه وکړي. د نیلي ښار یوه اوسېدونکي طاهره وايي، ماشوم یې چې درې ځله په خوارځواکۍ اخته شوی و، د نیلي په روغتون کې له ۱۰ تر ۱۵ ورځو بستر شو او ډاکترانو یې ناروغ ته ښه پاملرنه کوله.</p>
<p style="text-align: justify;">خو هغه څرګنده کړه، په روغتون کې بسترونه کم وو، ډېر وخت پر یوه چپرکټ دوه یا درې ناروغان بسترېدل او ناروغانو ځیني درمل په خپله پېرل.</p>
<p style="text-align: justify;">دا په داسې حال کې ده چې د دایکنډي سیمهییز مسوولین تل د روغتیايي خدماتو پر ښه کېدو ټینګار کوي.</p>
