<p style="text-align: justify;">کابل (پژواک، ۲۸ لړم ۱۴۰۲): د امریکا د سولې انسټیټیوټ ویلي، د افغانستان اقتصاد د خرابوالي پر لور روان دی خو د دغه هېواد اقتصاد وزارت دغه څرګندونې ردوي او وایي چې په اقتصادي برخو کې د پام وړ پرمختګونه شوي دي.</p>
<p style="text-align: justify;">د امریکا د سولې انسټیټیوټ (یواېسایپي) وړمه ورځ د افغانستان د اقتصادي وضعیت په اړه په یوه <strong><a href="https://www.usip.org/publications/2023/11/afghanistans-economy-once-again-nears-precipice">راپور</a> </strong>کې ویلي، که څه هم تېر کال په افغانستان کې د ثبات ځینې نښې وې، خو د دغه هېواد اقتصاد د خرابوالي پر لور روان دی او له پاکستانه د افغان کډوالو په زور ایستلو سره په افغانستان کې د بشري مرستو اړتیا نوره هم جدي شوې ده.</p>
<p style="text-align: justify;">خو د افغانستان د اقتصاد وزارت دغه راپور ردوي او وایي: «د افغانستان اقتصادي وضعیت خرابوالي په اړه د امریکا د سولې انسټیټیوټ له خوا نشر شوی راپور بېبنیاده دی، موږ یې ردوو؛ په تېرو دوو کلونو کې په اقتصادي برخه کې مهمې لاستهراوړنې شته او د پام وړ پرمختګونه شوي.»</p>
<p style="text-align: justify;">د دغه وزارت په خبرپاڼه کې راغلي: «سترو اقتصادي شاخصونو، کرنو او اجرااتو ته په کتو د انفلاسیون کچې راټیټدل، د افغانیو د ارزښت ثبات، د ملي عوایدو او صادراتو کچې زیاتوالی او له بهرنیو مرستو پرته له خپلو داخلي عوایدو د عادي بودجې لګښتونه او پراختیايي پروژو تمویل د افغانستان د رښتیني پرمختګ او اقتصادي خوځښت څرګندونه کوي.»</p>
<p style="text-align: justify;">دا په داسې حال کې ده چې نړۍوال بانک د تېرې تلې میاشتې په نهمه په یوه راپور کې ویلي وو، په تېرو نهو میاشتو کې د افغانستان واردات ۲۷ سلنه ډېر شوي، صادرات یې نیم سلنه کم شوي او د بهرنیو اسعارو پر وړاندې د افغانۍ ارزښت په منځنۍ کچه څه باندې ۲۸ سلنه لوړ شوی دی.</p>
