فیضاباد (پژواک، ۲۳ مرغومی ۱۴۰۲): بدخشان کې ځايي مسوولین وايي، د ځایي مسوولینو او قومي مخورو په منځګړیتوب د دغه ولایت په کشم ولسوالۍ کې د دوو کورنیو ترمنځ شلکلنه دښمني پای ته ورسېده.
د کشم ولسوال قاري محمداصف ظفریار وايي، د مرحوم عبدالمتین او مرحوم عبدالاول کورنیو ترمنځ دښمني چې شل کاله مخکې د دې ولسوالۍ په ناب کلي کې د میراث پر سر رامنځته شوې وه، پای ته ورسېده.
هغه زیاته کړه، په یاده دښمنۍ کې د «رفیعالله» په نوم یو کس وژل شوی و چې نن مقابل لوری د رفیعالله د زامنو او کورنۍ له خوا وبښل شو او شلکلنه دښمنۍ ته یې د پای ټکی کېښود.
هغه وايي، یادې کورنۍ چې اوس یې یو بل ته د دوستۍ او ورورۍ لاس ورکړ، وايي چې له شلو کلونو راهیسې یې هیڅ د ارامۍ احساس نه دی کړی، بلکې اندېښمنې به وې چې دغه دښمني یې لا لویه نه شي.
هغه زیاتوي چې اوس د مخورو او مسوولینو په منځګړیتوب د یادو کورنیو ترمنځ دښمني حل شوې او اندېښنې یې له منځه تللې دي.
هغه زیاتوي، تل د ورته قضیو د حل برخه کې کار کوي او هڅه کوي چې مخور خلک وهڅوي او د هغوی په مرسته دښمنۍ پای ته ورسوي.
Views: 11
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن