<p style="text-align: justify;">کابل (پژواک، ۴ سلواغه ۱۴۰۲): فراه او لغمان کې له ۱۳۴۳ کورنیو سره نغدي او د خوراکي توکو او غور او اروزګان کې له ۴۳۲۲ کسانو سره د کار په بدل کې نغدي مرستې وشوې.</p>
<p style="text-align: justify;">د فراه ولایت د کلیو، بیارغونې او پراختیا ریاست په خبرپاڼه کې راغلي چې د دغه ولایت په جوین ولسوالۍ کې د ملګرو ملتونو د خوړو نړۍوال پروګرام له لوري له ۴۹۱ کورنیو سره د خوراکي توکو مرستې وشوې.</p>
<p style="text-align: justify;">سرچینې لیکلي چې په دغو مرستو کې هرې کورنۍ ته، ۵۰ کیلوګرامه اوړه، پنځه لېتره غوړي، شپږ کیلوګرامه دال او ۳۰ کڅوړې د ماشومانو تقویتي خواړه ورکړل شوي دي.</p>
<p style="text-align: justify;">د فراه د اطلاعاتو او فرهنګ ریاست په خبرپاڼه کې راغلي چې د دغه ولایت په فراهرود ولسوالۍ کې ډنمارک موسسې له لورې له پاکستانه راستنو شوو ۱۹۵ کورنیو سره نغدي مرسته وشوه.</p>
<p style="text-align: justify;">سرچینې لیکلي چې په دغه مرسته کې ۱۱۹ کورنیو ته د کورنۍ په سر ۱۹۶۰۰ افغانۍ او ۷۶ نورو کورنیو ته ۹۶۰۰ افغانۍ ورکړل شوې دي.</p>
<p style="text-align: justify;">د یوه بل خبر له مخې، د لغمان ولایت د کلیو بیارغونې او پراختیا رییس مولوي محمدظاهر زرکمر وایي چې د دغه ولایت په بادپښ او الیشنګ ولسوالیو کې د ملګرو ملتونو د خوړو نړۍوال سازمان له لوري له ۶۵۷ کورنیو سره د خوراکي توکو مرستې وشوې.</p>
<p style="text-align: justify;">سرچینې لیکلي چې په دغو مرستو کې هرې کورنۍ ته ۵۰ کیلوګرامه اوړه، پنځه لېتره غوړي، اووه کیلوګرامه دال نخود، ۳۰ پاکټه مغزي حلوا، او درې کیلو تغذي اوړه ورکړل شوي دي.</p>
<p style="text-align: justify;">دغه راز د اروزګان د کلیو بیارغونې او پراختیا ریاست، اداري مدیر ننګیالی حبیبي وایي چې د دغه ولایت په چنارتو ولسوالۍ کې د نړۍوال بانک له لوري له درې زره او ۳۲۲ کسانو سره د کار په بدل کې نغدي مرستې وشوې.</p>
<p style="text-align: justify;">هغه وویل چې یادو کسانو ته په خپلو سیمو کې ۲۳ کیلومتره سړک هوارولو، د ۴۵ کیلومتره کانال پاکولو او د ۴۰۰ متره استنادي دېوال په ګډون د ۳۲۰ متره ګبین دېوال جوړولو پروژه کې د کار زمینه برابره شوې وه او د ورځې ۴۵۰ افغانۍ ورکول کېدې.</p>
<p style="text-align: justify;">د غور والي ویاند عبدالواحد حماس هم وایي چې د دغه ولایت په مرکز کې له ۱۰۰۰ کسانو سره د کرنې، اوبولګولو او مالدارۍ ریاست له لورې د کار په بدل کې نغدي مرسته وشوه.</p>
<p style="text-align: justify;">هغه وویل چې یادو کسانو شل ورځې په خپل سیمو کې په رغنیزو بېلابېلو پروژو کې کار کړی و او هر کس ته ۶۹۶۵ افغانۍ ورکړل شوې دي.</p>
د یو بل خبر له مخې، د پنجشېر ولایت د کرنې اوبولګولو او مالدارۍ رییس فضلالله دیوبندي وایي، د ناروې کمېټې د پنجشېر ولایت په دره ولسوالۍ کې له ۱۰۰۰ مالدارو کورنیو سره د حیواني خوړو (کنجاړې) مرسته وکړه.
د هغه د معلوماتو له مخې، په دغو مرستو کې هرې کورنۍ دو سوه کیلوګرامه کنجاړه ورکړل شوې ده.
