<p style="text-align: justify;">ګردېز (پژواک، ۲۴ سلواغه ۱۴۰۲): د پکتیا د روغتیا برخې مسوولين وايي چې په تېر یو کال کې د دغه ولایت په مرکز او دوه ولسوالیو کې ۴۱ کسان لېوني سپیانو داړلي دي.</p>
<p style="text-align: justify;">د پکتیا د عامې روغتیا ریاست د ډېټابس مسوول ډاکټر ضیاوالحق صابر پژواک خبري اژانس ته وویل چې په تېر یو کال په مرکز ګردېز، جانيخیل او ځاځياریوب ولسوالیو کې ۴۱ کسان لېونیو سپیانو داړلي دي.</p>
<p style="text-align: justify;">هغه وايي: «مونږ یوازې هغه ارقام ثبت کړي چې خلکو یې مونږ ته مراجعه کړې، کېدای شي ارقام تر دې لوړ وي.»</p>
<p style="text-align: justify;">هغه زیاته کړه چې دوی روغتیایي ټیمونه سیمو ته هم لېږلي، څو هغه کسان چې لیونیو سپیو داړلي دي واکسین ورته تطبیق کړي.</p>
<p style="text-align: justify;">بل لور ته خلک هم د لیونیو سپیانو له ډېرېدو شکایت کوي.</p>
<p style="text-align: justify;">د سیدکرم ولسوالۍ اوسېدونکي غازي پژواک ته وویل چې په دې ورستیو کې کوڅه ډب او لیوني سپي ډېر شوي دي.</p>
<p style="text-align: justify;">هغه وویل چې څو میاشتې وړاندې يې یو زوی او یوه لور سپیانو داړولي وو.</p>
<p style="text-align: justify;">هغه وايي: «بیا مې د ګردېز حوزي روغتون ور وستل، هلته یې دواړو ته درې- درې ځلې واکسین وکړ.»</p>
<p style="text-align: justify;">دغه راز، د څمکنیو اوسېدونکي سخيجان پژواک ته وویل، د دوی د کورنۍ غړو په ګډون په دې ولسوالۍ نهه کسان په تېر یو کال سپیانو داړلي دي.</p>
<p style="text-align: justify;">هغه له اړوند ادارو غوښتنه وکړه چې د لېونیو سپیانو د له منځه وړلو لپاره جدي اقدام وکړي.</p>
<p style="text-align: justify;">د یادونې ده چې په دې ورستیو کې د پلازمېنې کابل په سړکونو کې هم د شپې له مخې ګڼ شمېر کوڅهډب سپي تر سترګو کېږي.</p>
