<p style="text-align: justify;">کابل (پژواک، ۴ کب ۱۴۰۲): د بېړنیو خدمتونو د وړاندې کولو نړیوال صندوق «ګلوبل فنډ» وایي، په افغانستان کې یې د روغتیایي خدمتونو وړاندې کولو لپاره څلور میلیون او اووه لکه ډالره مرسته تصویب کړې ده.</p>
<p style="text-align: justify;">یاد سازمان تېره ورځ په یوه <strong><a href="https://www.theglobalfund.org/en/news/2024/2024-02-22-global-fund-emergency-services-afghan-returnees/#:~:text=GENEVA%2FKABUL%20%E2%80%93%20The%20Global%20Fund,country%20in%20the%20coming%20year.">خبرپاڼه</a> </strong>کې ویلي چې دغه مالي مرسته به د ایچایوي ایډز، نري رنځ یا تبرکلوز او ملاریا ناروغیو پر تشخیص او درملنه او دغه راز په دې اړه پر عامه پوهاوي د ملګرو ملتونو د پراختیایي پروګرام «UNDP» له لوري ولګول شي.</p>
<p style="text-align: justify;">د سرچینې د معلوماتو له مخې، له دغو مالي مرستو په استفاده به له پاکستانه راستنو شوواو راستنېدونکو ته هم بېلابېل خدمات وړاندې شي.</p>
<p style="text-align: justify;">خبرپاڼه کې راغلي چې د یادې ادارې له خوا پر هغو ۶۶ میلیون ډالرو، څلور اعشاریه اووه میلیون نوره اضطراري مالي مرسته ورزیاته شوه چې د ۲۰۲۴ کال د جنورۍ میاشتې له لومړۍ نېټې د یوې درې کلنې دورې لپاره په پام کې نیول شوې ده.</p>
<p style="text-align: justify;">دا په داسې حال کې ده چې د تېرې سلواغې میاشتې په ۲۳مه د ملګرو ملتونو د بشردوستانه مرستو همغږي کوونکي دفتر (اوچا) ویلي چې پرتګال د افغانستان له بشردوستانه صندوق سره ۲۰۰ زره یورو مرسته کړې ده.</p>
