یو شمېر ازبکستاني سوداګرو افغانستان کې په بېلابېلو صنعتي او تولیدي برخو کې پانګونې ته لېوالتیا ښودلې

مزارشریف (پژواک، ۱۷ غبرګولی ۱۴۰۳): د ازبکستان یو شمېر سوداګرو د بلخ له والي سره په لیدنه کې ویلي، چمتو دي چې په دغه ولایت کې په بېلابېلو برخو کې پانګونه وکړي.

د بلخ ولایت مقام د رسنیو او معلوماتو مرکز په خپره شوې خبرپاڼه کې راغلي، پرون له غرمې مخکې یو شمېر ازبکستاني سوداګرو له والي محمدیوسف وفا سره ولیدل.

سرچینه وايي، په دې ناسته کې د بلخ د سوداګرۍ او پانګونې خونې رییس اسدالله اسدي وویل چې د اسلامي امارت په راتګ سره د دواړو هېوادونو د ملي سوداګرو ترمنځ د اقتصادي پیاوړتیا په موخه دا ډول ډېرې ناستې شوې او د دواړو لورو لپاره په ګټه تمامې شوې دي.

اسدي زیاته کړه، افغانستان کې اوس د ښه کار کولو زمینه برابره ده، د زیربناوو، صنعت، سوداګرۍ، کرنې او کانونو برخو کې لویو پانګونو ته موقع شته، همدارنګه د ډبرو، پنبې او انرژۍ برخو کې افغانستان، په ځانګړې توګه بلخ ولایت ډېر تولیدات لري، باید د دواړو هېوادونو ملي سوداګر ورته پاملرنه ډېره کړي.

وروسته د بلخ والي محمدیوسف وفا له ازبکستاني او ملي  سوداګرو مننه وکړه چې د افغانستان اقتصادي پرمختګ برخه کې یې پوره هڅې کړې او اوس هم هر ډول شرایط برابر دي چې باید دلته پانګونې وشي.

په وروستیو کې د ازبکستان د سوداګرو په استازیتوب نادر رستم ویلي، د ازبکستان سوداګر غواړي د شیدو، بوټانو، ساختماني موادو، جامو جوړولو، د ډبرو له سکرو د برېښنا د تولید برخو کې چې خام مواد یې له افغانستانه ترلاسه کېږي، پانګونې وکړي.

د سرچینې د معلوماتو له مخې، یادو سوداګرو د بلخ له والي سره تر لیدنې وروسته د صنعت او سوداګرۍ خونه کې د دواړو لورو سوداګرو پر یو شمېر نورو مهمو موضوعاتو بحث او خبرې کړې او ځینې سوداکریزې هوکړې یې هم لاسلیک کړې دي.