<p style="text-align: justify;">کابل (پژواک، ۲۴ غبرګولی ۱۴۰۳): اقتصادي کمېسیون د اوبو او برېښنا وزارت ته دنده سپارلې څو د کابل اړوند د سروبي دویم بند جوړولو او په جوزجان کې د ۳۰۰ ميګاواټه ګازي برېښنا د تولید په اړه له اړوندو شرکتونو سره تخنیکي بحثونه وکړي.</p>
<p style="text-align: justify;">د اقتصادي معاونیت خبرپاڼه کې راغلي چې تېره ورځ د ریاستالوزرا اقتصادي مرستیال ملا عبدالغني برادر په مشرۍ د اقتصادي کمېسیون غونډه جوړه شوه.</p>
<p style="text-align: justify;">سرچينې لیکلي، په دې غونډه کې د کابل ولایت اړوند د سروبي دویم بند جوړېدو، په جوزجان کې د ۳۰۰ ميګاواټه ګازي برېښنا د تولید، د کانونو او پټرولیم وزارت له لوري د رغنیزو موادو په اړه د جوړې شوې مسودې او یو شمېر نورو اقتصادي موضوعاتو په اړه بحث وشو.</p>
<p style="text-align: justify;">په غونډه کې د اوبو او برېښنا وزارت ته دنده سپارل شوې چې د اقتصادي کمېسیون د نظرونو په پام کې نیولو سره دې د سروبي دویم بند جوړېدو په اړه له بېلابېلو شرکتونو سره تخنیکي بحثونه ترسره او راپور دې اقتصادي کمېسیون ته وړاندې کړي.</p>
<p style="text-align: justify;">دغه راز، یاد وزارت ته لارښوونه شوې څو په جوزجان ولایت کې د ۳۰۰ ميګاواټه ګازي برېښنا د تولید په اړه د کانونو او پټرولیم وزارت په ګډون د طرحې له وړاندېکوونکي شرکت سره تخنیکي بحثونه وکړي او خپل راپور دې اقتصادي کمېسیون ته وړاندې کړي.</p>
<p style="text-align: justify;">اقتصادي کمېسیون لیکلي، په دې غونډه کې د کانونو او پټرولیم وزارت له لوري د ساختماني موادو (شګه، جغل او تهداب تیږه) په اړه د وړاندې شوې مسودې په اړه هم بحث وشو او د یاد وزارت په مشرۍ د ساختماني موادو په هوکړهلیک کې ټاکل شوې کمېټې ته دنده وسپارل شوه چې د اقتصادي کمېسیون له لوري د راغلو تعدیلاتو په نظر کې نیولو سره دې د یادې مسودې د لا غني کولو په موخه له اړوندو وزارتونو او ادارو سره ګډ مجلس ترسره او نهايي مسوده دې د منظورۍ لپاره د اسلامي امارت د مشرتابه دفتر ته واستوي.</p>
