اروزګان کې د خیروکاریز ماسټر پلان د پلې کېدو پاتې چارې پیل شوې

<p style="text-align: justify;">ترینکوټ (پژواک، ۱۶ چنګاښ ۱۴۰۳): د اروزګان مرکز ترینکوټ ښار کې له څه‌کم درې کلونو ځنډ وروسته د خیروکاریز سیمې د ماسټر پلان پلې ‌کېدو پاتې چارې بیا پیل شوې دي.</p>

<p style="text-align: justify;">د اروزګان د مرکز ترینکوټ ښار اړوند خیروکاریز سیمه چې له کلونو راهیسې په‌کې په خپل‌سري ډول ودانۍ جوړې شوې وې، د مخکني حکومت پر مهال ورته یو منظم ماسټرپلان منظور شو چې بیا یې چارې نیمګرې پاتې شوې.</p>

<p style="text-align: justify;">په مخکني حکومت کې د اروزګان چارواکو ویلي وو، په خیروکاریز سیمه کې پر څلور زره جریب ځمکه باندې د ډيزاین شوي ماسټر پلان له‌مخې معیاري سړکونه، روغتیایي او ښوونیز مرکزونه، جوماتونه او نور ‎خدمات په پام کې نیول شوي دي.</p>

<p style="text-align: justify;">اوس په دغه ولایت کې مسوولین وايي، د یاد ماسټر پلان د پاتې برخې د پلې‌ کېدو چارې یې پیل کړې دي.</p>

<p style="text-align: justify;">د ترینکوټ ښاروال مولوي عبدالرشید هدایت د تېرې پنجشنبې په ورځ رسنیو ته وویل، له کور او ښار جوړولو ادارې سره په ګډه یې د خیروکاریز د ماسټر پلان د عملي کېدو چارې پیل کړې چې د نقشي ایستلو لومړۍ برخه به یې ډېر ژر بشپړه شي.</p>

<p style="text-align: justify;">هغه زیاته کړه، یاده سیمه به تر بشپړو دولتي خدمتونو لاندې راوستل شي او اوسېدونکو ته به یې په بېلابېلو برخو کې اسانتیاوې رامنځته شي.</p>

<p style="text-align: justify;">ورته مهال، د خیرو کاریز سیمې اوسېدونکي خوښي ښيي چې د دې سیمې د پراختیا او معیاري کېدو چارې پیل شوې دي.\</p>