<p style="text-align: justify;">کابل (پژواک، د وږي لومړۍ نېټه ۱۴۰۳): د اوبو او برېښنا وزارت وایي، دوو افغان او ترکي شرکتونو له بېلابېلو سرچینو څخه د ۹۰۰ مېګاواټه برېښنا د تولید په پروژو کې پانګهونې ته لېوالتیا ښودلې ده.</p>
<p style="text-align: justify;">د اوبو او برېښنا وزارت له لوري نن په خپره شوې خبرپاڼه کې راغلي چې د یاد وزارت سرپرست ملا عبداللطیف منصور په خپل کاري دفتر کې د« جياېسپي» او «اکلتاش» شرکتونو له مسوولینو سره وکتل او د ۹۰۰ مېګاواټه په وړتیا د لمریزې، بادي او اوبیزې برېښنا د تولید په پروژو کې د پانګهونې په اړه یې بحث وکړ.</p>
<p style="text-align: justify;">خبرپاڼه کاږي، په دغه لیدنه کې د یادو شرکتونو مسوولینو د ۹۰۰ مېګاواټه په وړتیا له بېلابېلو سرچینو د انرژۍ د تولید په پروژو او د هېواد دننه د برېښنا د انتقالي مزي په پراختیا کې د پانګونې لپاره لېوالتیا څرګنده او ژمنه یې وکړه چې د انرژۍ سکټور د ماسټر پلان د نوي کېدو او پراختیا برخه کې هم له دغه وزارت سره همکاري کوي.</p>
<p style="text-align: justify;">د خبرپاڼې په حواله، د اوبو او برېښنا وزارت سرپرست د هغوی د لېوالتیا د هرکلي ترڅنګ د پانګهونې لپاره د زمینې برابرولو برخه کې د دغه وزارت له لوري د همکاري ډاډ ورکړ او د چارو د پرمخ وړلو لپاره یې د اړینو همغږيو پر چټکتیا ټینګار وکړ.</p>
<p style="text-align: justify;">د یاد وزارت سرپرست وویل چې په افغانستان کې د برېښنا د تولید لپاره کافي سرچینې شته او په دې برخه کې پانګونه هم د پانګهوالو او هم د افغانستان د خلکو په ګټه ده.</p>
