<p style="text-align: justify;">فیضاباد (پژواک، ۳ تله ۱۴۰۳): بدخشان کې ځايي مسوولین وايي چې د دغه ولایت په مایمي ولسوالۍ کې د څه باندې ۳۱۰ زره امریکايي ډالرو په لګښت د نجونو یوه ښوونځي جوړولو چارې بشپړې او ګټې اخیستنې ته وسپارل شو.</p>
<p style="text-align: justify;">د بدخشان د پوهنې ریاست د نشراتو عمومي مدیر عبدالغني عابدي وايي په مایمي ولسوالۍ کې د نجونو «جامرچ» ښوونځي چارې په ۱۳۹۹ کال کې د یوه الماني مرستندویه بنسټ له لوري پیل شوې وې چې د اسلامي امارت له واکمنېدو مخکې یې ۷۰ سلنه چارې مخکې تللې وې.</p>
<p style="text-align: justify;">هغه زیاته کړه چې د دغه ښوونځي پاتې ۳۰ سلنه چارې د یاد ولایت د پوهنې ریاست په همکارۍ د ۶۶ زره امریکايي ډالرو په لګښت د اغاخان موسسې له لوري بشپړې او نن د ځینو ځايي ادارو د استازو په شتون کې ګټې اخیستنې ته وسپارل شو.</p>
<p style="text-align: justify;">د هغه په خبره، پر دغه ښووځي ۳۱۰ زره امریکايي ډالر لګښت راغلی چې د مرستندویه الماني بنسټ او اغاخان موسسې له لوري ورکړل شوی دی.</p>
<p style="text-align: justify;">عابدي وايي، دغه ښوونځی چې په ۳۸۸۸ متر مربع ځمکه کې په پاخه ډول جوړ شوی، ۱۳ درسي خونې لري چې دا مهال ۵۶۰ نجونې او هلکان پهکې زدهکړې کوي.</p>
<p style="text-align: justify;">هغه زیاته کړه چې د بدخشان د پوهنې ریاست د ښوونځیو د نیمګړو چارو بشپړولو برخه کې د موسسو له همکارۍ مننه کوي.</p>
