<p style="text-align: justify;">مزارشریف (پژواک، ۲۲ تله ۱۴۰۳): د بلخ مرکز مزارشریف ښار کې یو شمېر کارګرې ښځې او ماشومان د کار او مزد له کموالي شکایت کوي او له حکومته په دایمي توګه د کاري فرصتونو برابرولو غوښتنه کوي.</p>
<p style="text-align: justify;">د دغه ښار د پنځمې ناحیې اړوند یلمرب سیمه هغه ځای دی چې هره ورځ لسګونه ښځې له خپلو ماشومانو سره په کې د کار موندلو په موخه را ټوليږي.</p>
<p style="text-align: justify;">په یادو ښځو کې ډېری هغه دي چې د خپلې کورنۍ د نفقې تامینولو مسوولیت پر غاړه لري.</p>
<p style="text-align: justify;">د دغو کارګرو ښځو له ډلې حمیرا پژواک خبري اژانس ته وویل، هره ورځ دې سیمې ته د کار موندلو په موخه راځي، خو که یوه ورځ کار پیدا کړي څو ورځې نور بیا وزګاره وي.</p>
<p style="text-align: justify;">دې زیاته کړه: «د ژوند وضعیت مې خراب دی، اووه سره ماشومان لرم او خاوند مې مړ شوی دی، زه خپله دلته د کار کولو لپاره راځم، خو کله کار پیدا کېږي او کله بیخي نه وي.»</p>
<p style="text-align: justify;">هغې وویل چې د یوې کارګرې مزد ۱۵۰ افغانۍ دی چې له وچې ډوډۍ پرته پرې نور هیڅ هم نه کېږي.</p>
<p style="text-align: justify;">شاهګل د دې سیمې یوه بله کارګره هم د کار له کموالي شکایت کوي او وایي، سهار له لمانځه وروسته د کار په تمه راځي، خو ډېری وخت تر ماښامه ورته کار نه پیدا کېږي.</p>
<p style="text-align: justify;">هغې زیاته کړه: «خاوند مې وزګاره دی، زه د ۱۵۰ افغانیو په مزد ټوله ورځ کار کوم، سخت ژوند تېروم، په دې پیسو نه ډوډۍ کېږي، نه د کور کرایه او نه هم ژوند تېرېږي.»</p>
<p style="text-align: justify;">نوموړې له حکومته غوښتنه وکړه چې مرسته او لاسنیوی یې وکړي.</p>
<p style="text-align: justify;">مرجان یوه بله کارګره هم د کار له کموالي شکایت کوي او له حکومتي مسوولینو غوښتنه کوي چې دوی ته په دایمي توګه کاري فرصتونه برابر او یا هم مرسته ورسره وکړي.</p>
<p style="text-align: justify;">د دغو کارګرو ښځو سربېره یو شمېر ماشومان هم یادې سیمې ته د کار موندنې په موخه راځي.</p>
<p style="text-align: justify;">د بشیر په نوم ۱۳ کلن ماشوم وایي چې پلار یې ایران کې مزدوري کوي او دی اړ دی چې د خپلې کورنۍ نفقې پیدا کولو کې له پلار سره مرسته وکړي.</p>
<p style="text-align: justify;">هغه وایي، دا مهال چې د پنبې د حاصلاتو راټولولو موسوم دی، کله نا کله ورته کار پیدا کېږي او یو من پنبه په ۵۰ افغانیو راټولوي.</p>
<p style="text-align: justify;">بلخوا، د بلخ د کار او ټولنیزو چارو ریاست ښځو ته کار موندنې برخه کې ډاډ ورکوي.</p>
<p style="text-align: justify;">د بلخ د کار او ټولنیزو چارو رییس عبدالرحیم قانت پژواک ته وویل، اسلامي امارت هڅه کوي څو هغو ښځو ته چې د سړک پر غاړه کار کوي او یا هم پر نورو درنو کارونو بوختې دي، کاري فرصتونه برابر کړي.</p>
<p style="text-align: justify;">هغه زیاتوي، په دې وروستیو کې د حرفې په نوم یو امریت جوړېږي، څو کارګرو، کونډو او بېوزلو ښځو ته کاري فرصتونه برابر او یا هم له هغوی سره نغدي یا غیرنغدي مرسته وکړي.</p>
<p style="text-align: justify;">دا په داسې حال کې ده چې له دې مخکې حکومتي چارواکو ویلي وو چې د بېکارۍ کچې ټيټولو او کارموندنې په موخه پر لنډمهالو او منځمهالو طرحو کار کوي او د کارموندنې ملي پاليسي جوړوي.</p>
