<p style="text-align: justify;">کابل (پژواک، ۲۶ تله ۱۴۰۳): ټاکل شوې چې د افغانستان د کرکټ الف لوبډلې په ګډون د اتو هېوادونو ترمنځ د ځوانانو «ایمرجېنګ» اسیا جام شلاوریزې سیالۍ سبا په عمان کې پیل شي.</p>
<p style="text-align: justify;">په دغو سیالیو کې اته لوبډلې ګډون کوي چې پر دوو ګروپونو وېشل شوې دي.</p>
<p style="text-align: justify;">دغه راز، د یادو سیالیو په A ګروپ کې افغانستان، سریلانکا، بنګلهدېش او هانګکانګ او په B ګروپ کې د هند، پاکستان، عربي متحده اماراتو او عمان لوبډلې لوبېږي.</p>
<p style="text-align: justify;">د افغانستان کرکټ بورډ نن پر خپله فېسبوکپاڼه لیکلي چې د ځوانانو اسیا جام سیالۍ سبا (د جمعې ورځ) په عمان کې پیلېږي.</p>
<p style="text-align: justify;">کرکټ بورډ ویلي، په دغو سیالیو کې به افغان ابدالیان لوبډله خپله لومړۍ لوبه سبا ماښام شپږ بجې له سریلانکا سره، دویمه به د اکټوبر په ۲۰مه له بنګلهدېش او درېیمه به سیالي د همدې میاشتې په ۲۲مه له هانګکانګ سره ترسره کړي.</p>
<p style="text-align: justify;">د کرکټ بورډ معلوماتو له مخې، دغه سیالۍ به له سټار سپورټ، اې.ار.وای ټلوېزیوني او د «Fancode» ډیجیټلي شبکو له لارې په ژوندۍ بڼه خپرېږي.</p>
<p style="text-align: justify;">د یادونې ده، له دې مخکې افغان ابدالیان لوبډلې د هانګکانګ او عمان له لوبډلو سره د درې اړخیزې لوبلړۍ اتلولي ګټلې وه.</p>
