کابل (پژواک، ۲ لړم ۱۴۰۳): د ایران ولسمشر مسعود پزشکیان د هند له لومړي وزیر نرندرا مودي سره کتنه کې ویلي، ایران د هر هغه اقدام ملاتړ کوي چې په افغانستان کې د سولې او ارامۍ په ټینګښت کې مرسته وکړي.
د ایران ولسمشر مسعود پزشکیان او د هند لومړي وزیر نرندرا مودي پرون ماښام (سهشنبه، د لړم لومړۍ نېټه) د روسیې په کازان کې د برېکس ناستې په څنډه کې د افغانستان په اړه خبرې کړې دي.
د ایران ایرنا خبري اژانس لیکلي، پزشکیان په دې لیدنه کې ویلي چې د سیمې د راتلونکي جوړولو په انګېزه او اراده باید له افغانستان سره هم تعامل او خبرې وشي.
هغه ویلي: «باید مرسته وکړو څو د افغانستان ملت هم د ستونزو په حلولو سره سولې، ارامۍ او ثبات ته ورسیږي. د ایران اسلامي جمهوریت د هر هغه اقدام ملاتړ کوي چې په دغه هېواد کې د سولې او ارامۍ په ټینګښت کې مرسته وکړي.»
بلخوا، هندي رسنیو راپور ورکړی چې د دغه هېواد لومړي وزیر نراندرا مودي یاده لیدنه رغنده بللی او ویلي یې دي چې پر دوه اړخیزو اړیکو او په ځانګړې توګه د اړیکو د پیاوتیا پر راتلونکو لارو چارو خبرې شوې دي.
په راپور کې راغلي چې په دې لیدنه کې دواړو لورو د چابهار بندر او د شمال – جنوب نړۍوال سوداګریز دهلیز په شان په مهمو برخو کې د همکارۍ پر پیاوړتیا خبرې کړې دي.
دغه راز، د دواړو هېوادونو یاد مشران د اسیا د لودیځ پر وضعیت سربېره، په سیمه کې وروستیو د بدلونونو په اړه هم غږېدلي دي.
دا لومړی ځل دی چې پزشکیان له ولشمسر کېدو وروسته د هند له لومړي وزیر نرندرا مودي سره ګوري.
د روسیې د تاتارستان جمهوریت پلازمېنه کازان له پرون (سهشنبې) تر پنجشنبې د برېکس د ۱۶مې سرمشریزې لپاره د نړۍ د مشرانو کوربه دی.
