د افغانستان کرکټ ملي لوبډله نن له زمبابوې سره لومړۍ شل اووریزه لوبه کوي

کابل (پژواک، ۲۱ لېندۍ ۱۴۰۳): افغان کرکټ ملي لوبډله له زمبابوې سره د درېیو نړۍوالو شل اووریزه سیالیو په لړ کې نن خپله لومړۍ لوبه د دغه هېواد په پلازمېنه هرارې کې ترسره کوي.

د افغانستان کرکټ بورډ ویلي، افغان لوبډله به نن د زمبابوې لوبډ‌لې پر وړاندې د درېیو نړۍوالو شل اووریزو سیالیو په لومړۍ لوبه کې د سیالۍ ډګر ته ښکته شي.

سرچینې زیاته کړې، دغه سیالۍ د زمبابوې په کوربه‌توب په هرارې لوبغالي کې ترسره کېږي چې د افغانستان پر وخت به د مازیګر په څلور بجو ترسره شي.

ټاکل شوې چې افغان لوبډله به خپله دویمه لوبه د ډسمبر په ۱۳مه او درېیمه لوبه به د همدې میاشتې په ۱۴مه له زمبابوې سره ترسره کړي.

د یادونې ده، افغان لوبډله له یادو سیالیو وروسته درې یو ورځنۍ سیالۍ او ‎له هغه وروسته دوه ټېسټ لوبې ترسره کوي.