<p style="text-align: justify;">کابل (پژواک، ۹ مرغومی ۱۴۰۳): د بهرنیو چارو وزارت سیاسي مرستیال وايي، تعلیم د یوه هېواد د پرمختګ مهمه وسيله او د اوسني عصر اړتيا ده، په همدې اساس اسلامي امارت د اسلامي شريعت په اډانه کې د دیني او عصري علومو پراختیا او پیاوړتیا ته ژمن دی.</p>
<p style="text-align: justify;">د بهرنیو چارو وزارت په خبرپاڼه کې راغلي چې د یاد وزارت سیاسي مرستیال شېرمحمد عباس ستانکزي یادې څرګندونې له یو شمېر دیني عالمانو سره د لیدنې پرمهال کړې دي.</p>
<p style="text-align: justify;">خبرپاڼه کاږي، په دې لیدنه ديني عالمانو له اسلامي نظام، ډاډمن امنيت، اقتصادي ځان بسياينې او د رغنيزو چارو له امله خوښي وښوده.</p>
<p style="text-align: justify;">د خبرپاڼې په حواله، یادو عالمانو د حاکم اسلامي نظام د تقویې او تداوم هیله څرګنده او دغه راز یې د ځينو سیمو وګړو ته د ژوند د اسانتیاوو د برابرولو او د شته ستونزو د هوارۍ غوښتنه وکړه.</p>
<p style="text-align: justify;">خبرپاڼه کې دغه راز راغلي، د بهرنیو چارو وزارت سیاسي مرستیال د ملت او حکومت ترمنځ د عالمانو رول د وصل پل وباله او د دوی غوښتنو ته يې په ځواب کې وويل: «دا هېواد او ملت نږدې نيمه پېړۍ جګړو ځپلی، رنځېدلی او کړېدلی، زمونږ هڅه دا ده چې ملت مو بيا د دغه ناخوالو ښکار نه شي، ستونزو ته يې لاسرسی وشي او په ګډه يو سوکاله، باثباته او په هره برخه کې پر ځان بسيا افغانستان ولرو.»</p>
<p style="text-align: justify;">د خبرپاڼې د معلوماتو له مخې، ستانکزي د تعليمي برخې غښتلتیا ته په اشاره زياته کړه، تعلیم د یو هېواد د پرمختګ مهمه وسيله او د اوسني عصر اړتيا ده، په همدې اساس اسلامي امارت د اسلامي شريعت په اډانه کې د دیني او عصري علومو پراختیا او پیاوړتیا ته ژمن دی او په يوې داسې طرحه کار کوي چې ټولې اړتیاوې په نظر کې نیول شوې وي.</p>
<p style="text-align: justify;">دا په داسې حال کې ده چې له دې مخکې هم د بهرنیو چارو وزارت سیاسي مرستیال د تعلیم پر اړتیا ټینګار کړی و.</p>
