جلالاباد (پژواک، ۱۸ سلواغه ۱۴۰۳): د ننګرهار د عامې روغتيا رياست وايي، د دغه ولايت په پنځو ولسواليو کې يې خلکو ته د بېړنيو روغتيايي خدمتونو وړاندې کولو په موخه شپږ ګرځنده روغتيايي ټيمونه فعال کړي دي.
دغه روغتيايي ټيمونه د روغتيا نړۍوال سازمان په مالي ملاتړ د ورلډ موسسې له لوري مدیریت کېږي.
د ننګرهار د عامې روغتيا رييس مولوي امينالله شریف چې د دغو ګرځنده روغتيايي ټيمونو پرانيسته يې کوله وويل چې د روغتيا نړۍوال سازمان په مالي لګښت يې په پنځو ولسواليو کې شپږ ګرځنده روغتيايي ټيمونه رامنځته کړل.
هغه زیاته کړه، دغه روغتيايي ټيمونه چې خدمات به يې د ورلډ موسسې له خوا ترسره کېږي، د دغه ولايت په دره نور، کوز کونړ، بهسودو، رودات او بټيکوټ ولسواليو کې فعال شول.
د عامې روغتیا رییس د یادو روغتیايي ټيمونو کارکوونکو ته یو شمېر لازمې لارښوونې وکړې او ټينګار يې وکړ چې په لرو پرتو سیمو کې له ناروغانو سره ښه چلند وکړي، د اړتیا پر مهال اړین درمل ورکړي او ورسپارل شوی مسوولیت په ښه ډول ترسره کړي.
مسوولین وایي، له دې مخکې د یاد ولایت په ځينو نورو ولسواليو کې هم د بېړنيو روغتيايي خدمتونو په موخه دا ډول ګرځنده روغتيايي ټیمونه فعال شوي دي.
