مزارشریف (پژواک، ۵ کب ۱۴۰۳): سیمهییز مسوولین وایي، بلخ کې د ۱۳ لوبډلو ترمنځ د وزلوبې پیل شوې سیالۍ د «یما پټرول» لوبډلې په اتلولۍ سره پای ته ورسېدې.
د افغانستان د وزلوبې، نیزهبازۍ او سیمهییزو لوبو فدراسیون مشر غلام سرور وایي چې یادې سیالۍ د وزلوبې ملي او نړۍوالو لوبو ته دغوره چاپندازانو پېژندنې په موخه پیل شوې وې او پایله کې یما پټرول لوبډلې د پر له پسې لوبو په ګټلو سره د دغو سیالیو اتلولي خپله کړه.
هغه زیاتوي چې دغه لوبې د هېواد شمال او شمال ختیځ نهو ولایتونو څخه د ۱۳ لوبډلو په ګډون لس ورځې مخکې د کمال نبيزاده شرکت په مالي ملاتړ پیل شوې وې.
د جلال په وینا یادو سیالیو کې لومړی مقام یما پټرول، دویم بدخشان، درېیم سمنګان او څلورم مقام بغلان لوبډلو خپل کړل.
د دغو لوبو یو لوبغاړی پهلوان سعدي وایي، د دغه ډول سیالیو ترسراوی مرسته کوي تر څو د وزلوبې لوبه وده وکړي او هم ځوانان وهڅېږي څو ملي او نړۍوالو لوبو ته تیاری ولري.
هغه له حکومتي مسوولینو او سوداګرو وغوښتل څو د دې لوبې له لوبغاړو ملاتړ وکړي.
پهلوان نجیب چې په سمنګان لوبډله کې لوبه کړې، خوښ دی چې ده او نورو ځوانانو ته په دغه ډول لوبو کې برخه ورکول شوې ده.
هغه زیاته کړه، دې لوبو کې ګډون ورته فرصت برابروي چې د وزلوبې په نړۍوالو لوبو کې هم ګډون وکړي.
د یادونې ده، پای کې لومړي مقام ته لس زره ډالره نقدي جایزه، دویم او درېیم مقام ګټونکو لوبډلو ته د کپونو ترڅنګ یو یو موټر ډالۍ هم ورکړل شول.
وزلوبه د افغانستان له سنتي او لرغونو لوبو ګڼل کېږي چې په ټول هېواد او ځانګړي توګه شمالي ولایتونو کې ډېر مینهوال لري.
