<p style="text-align: justify;">ګردېز (پژواک، ۱۰ کب ۱۴۰۳): د پکتيا د عامې روغتيا رياست وايي چې د روان میلادي کال په تېرو دوو میاشتو کې په دغه ولایت کې د شري ناروغي د تېر کال د همدې مودې په پرتله ۶۰ سلنه ډېره شوې ده.</p>
<p style="text-align: justify;">د پکتيا د عامې روغتيا رييس ډاکټر معراجګل عادل پژواک خبري اژانس ته وويل چې په دغه ولايت کې د تېر ۲۰۲۴ میلادي کال په لومړیو دوو مياشتو کې د شري ناروغۍ ۴۴ پېښې ثبت شوې وې خو د روان ۲۰۲۵ کال په لومړیو دوو مياشتو کې ۱۱۹ پېښې ثبت شوې چې ۶۰ سلنه ډېروالی ښيي.</p>
<p style="text-align: justify;">هغه زیاته کړه چې په ماشومانو کې د يادې ناروغۍ د مخنيوي او محوې لپاره يې لرو پرتو سيمو ته خپل روغتيايي ټيمونه لېږلي او په ياده موده کې یې تر ۲۵۰۰ ډېرو ماشومانو ته د شري واکسين تطبيق کړی دی.</p>
<p style="text-align: justify;">د نوموړي په خبره چې د شري پر ناروغۍ اخته ټول له ۱۴ کلنۍ کمعمره ماشومان دي.</p>
<p style="text-align: justify;">د ماشومانو برخې متخصص ډاکټران بيا شری يوه ويروسي ناروغي يادوي او د مخنيوي لپاره يې واکسين تر ټولو غوره لار بولي.</p>
<p style="text-align: justify;">د پکتيا د حوزوي روغتون د ماشومانو څانګې مشر ډاکټر ادمخان ابراهيمي وايي، يو ماشوم چې کله د شري پر ناروغۍ اخته کېږي، تر ټولو ډېر تاثیر يې په سترګو، خولې، هضمي او تنفسي سيستمونو باندې کوي.</p>
<p style="text-align: justify;">هغه وویل چې د شري پر ناروغۍ اخته ماشومانو ته بايد ښه او نرمه غذا او ويټامين اې ورکړل شي.</p>
<p style="text-align: justify;">د نوموړي په خبره، که کوم ماشوم ياده ناروغي ولري او ډېره تبه یې وي، بايد په ګرم ځای کې ونه ساتل شي.</p>
<p style="text-align: justify;">ورته مهال، د پکتيا يوه اوسېدونکي حاجي نعيم چې خپل ماشوم يې د دغه ولایت په حوزوي روغتون کې بيستر کړی وايي چې د بسترونو د کموالي له امله پر بېلابېل ډول ناروغيو اخته ماشومان په يوه خونه کې ساتل کېږي.</p>
<p style="text-align: justify;">هغه وويل، د دې لپاره چې شری ساري ناروغي ده، نو بايد ناروغان یې په ځانګړو اتاقونو کې بستري شي.</p>
<p style="text-align: justify;">د پکتيا يوه بل اوسېدونکي بشير هم پژواک ته وويل چې د ماشومانو څانګې بيسترونه کم دي او په هر بستر کې دوه يا درې ماشومان بيستر وي چې يو بل ته د ناروغيو انتقال ډېر اسانه کېږي.</p>
<p style="text-align: justify;">دغه راز، د پکتيا د عامې روغتيا رياست مسوولينو له خلکو غوښتنه وکړه چې په ماشومانو کې د شري ناروغۍ د مخنيوي لپاره بايد د ډاکټرانو سپارښتنې په پام کې ونيسي.</p>
