<p style="text-align: justify;">جلالاباد (پژواک، ۲۰ وری ۱۴۰۴): ننګرهار کې سیمهییز مسوولین وايي چې په تېره شاوخوا یوه اونۍ کې د تورخم له لارې له پاکستان څخه ۴۰۰۰ کورنۍ راستنې شوې دي.</p>
<p style="text-align: justify;">پاکستاني رسنیو تېره اونۍ وويل، په پاکستان کې افغان کډوالو ته د ورکړل شوي ضربالاجل له پای ته رسېدو وروسته پاکستاني پولیسو خپل اقدامات پیل کړي او په اسلاماباد او راولپینډۍ کې یې یو شمېر افغان کډوال نیولي دي.</p>
<p style="text-align: justify;">په پاکستان کې افغان کډوالو ته د وتلو ورکړل شوی ضربالاجل د مارچ په ۳۱مه پای ته ورسېد.</p>
<p style="text-align: justify;">د ننګرهار ولایت مقام رسنیو دفتر د وري په ۲۰مه پژواک ته راستول شوې خبرپاڼه کې ويلي چې د روانه اونۍ د تورخم له لارې هېواد ته له پاکستان څخه څلور زره افغانې کورنۍ راستنې شوې چې ډېره برخه يې په اجباري ډول را ایستل شوي دي.</p>
<p style="text-align: justify;">د سرچینې په وینا، دغه کورنۍ د پښتونخوا په ګډون د پاکستان پنجاب او يو شمېر نورو سيمو څخه راغلي چې هره ورځ يې په شمېر کې زياتوالی راځي.</p>
<p style="text-align: justify;">بلخوا، د ننګرهار د کډوالو او راستنېدونکو چارو ریاست مسوولین وايي، راستنو شوو کډوالو ته یې په بېلابېلو برخو کې د مرستو زمینه برابره کړې ده.</p>
<p style="text-align: justify;">د خپرو شوو راپورونو له مخې، اوسمهال په پاکستان کې شاوخوا درې میلیونه افغانان ژوند کوي چې له دې ډلې یو میلیون یې د اوسېدو قانوني اسناد نهلري.</p>
